Read Uab Meto SIT PULES 45 Bible Online

SIT PULES 45 - Uab Meto bible

SIT PULES 45

¹Sit Pules na'ko Nai Korah in anah sin. Sit maliaba' neu atopu sit sin. Natuin sit hanan: Uk-uki in sufan.

²Uab-uab alekot anpoi na'ko au nekak, au u'tulu' au sit neu kesel. Onle' atoni atui ahinet in a'tui, au mak naloitan he naiti ne.

³Ho es mumas amfin anbi ale mansian, ho uab nahenu nok mahoe, es nanet Uisneno anfe ko tetus tal nabal-bal.

⁴Mu'futu' ho suni anbi ho tnanam, hoi kesel amasat, ho amatanit ma apinat ko!

⁵Amnao mat nok apinat ma mnisat mutau amneot nek muti'; nok be'it ma matani amsimo mnisat le a'naek.

⁶Ho as'anef le na'aik napau musu in tekan, uf-uf natsel anbi ho haem.

⁷Uisneno anfe ko kuasat he nati' ho muplenat, ho kuasat nane mes na'ki' tal nabal-bal, ma ho mes muplenat ho to nok amneot.

⁸Hom nek amneot ma muto'an amle'ut; natuin Uisneno, ho Uisneno anbeti nalali ko, ma anhalin ko nesin ale kesel bian.

⁹Ho bale pake lo fomeni, fomeni na'ko klali, min fomeni ma haumeni; fun heo anbi sonaf sikal anmo'e ko ma ho mumlil.

¹⁰Abha'et anbi ho sonaf esle' fetnai sin. Anbi ho toko' in kabenan ne'u kato' le mapake le mapake' neki mnatu nesaf anhake.

¹¹Hoi Fetnai sin mitnin au uab sin, amnikan pah ma hi ini sin.

¹²Ho masam nane anfutu kesel in nekan, in anfani ho tuam, ma olbes meu in.

¹³So sin le antok anbi Tirus sin neki tulu' neu ko; atoni amu'it sin mes antom nek ko.

¹⁴Kesel in fetnai mes antam nahenu nok amasat mes anson mnatu anbi in sobalu betkone.

¹⁵Nok bale pake le matui mes natnana ma neki in neu kesel, le anfeto ma in soba sin natuin in, sin amsa' neki sin neu kesel.

¹⁶Sin na'ba' nok malinat leka sin nok antam anbi kesel in sonaf!

¹⁷Ho, au kesel, au mes upeni naimnuke namfau he nati' natua sin na'i sin a'toko. Au mes aiti' sin anfani ana' aplenat anbi pah pinan funam natef.

¹⁸Nok sit le i au u'naeb ho kanam anbi ale batan ma ale pah-pah mes anpules ko talantia nabal-bal.