Read Uab Meto SIT PULES 48 Bible Online

SIT PULES 48 - Uab Meto bible

SIT PULES 48

¹Sit Pules na'ko Nai Korah in anah sin.

²Namneo UISNENO nane amasat ma mapules anbi tubu knino le Uisneno In kot, anbi tubu aknino.

³Sion, tubu Uisneno amnanu ma amasat kun, kot Kesel Amnanut le neki halinat neu pah pinan funam natef.

⁴Uisneno natua anbi In sonaf, In es anpanat nani.

⁵Amkiso kesel-kesel sin nabuan, ma sin neman hen makenan.

⁶Mes leka sin nit tubu nane, sin namkakan, sin na'tai ma naenan nok amtaus.

⁷Anbi nane sin na'tai nok amtaus ma menas, onle' bife le he nahoni,

⁸onle' abnao le anpe' pisa-pisa natuin anin slutuf.

⁹Onle' hit atnen, ma le tabu le i hit tit, anbi UISNENO Akuasat Afinit In kot. Kot nane lo hit Uisneno In kot, In anpesi in talantia nabal-bal.

¹⁰Hai mitenab Ho manekam anbi Ho Ume in nanan, koi Uisneno.

¹¹Au pules u'naeb Ho kanam anfun ma natef pah pinan, Ho es muplenat kum nok amneot.

¹²Maut he nati' to Sion ma Yehuda sin na'ba' nok malinat, natuin Hom kas sin musu.

¹³Amtol man Sion, amfun mitef in, ma amso'i in el fatu sin.

¹⁴Amlilo in baik lape, ma amtae in kot, he nati' meunuan neu hi sufam ma hi ka'um sin.

¹⁵“In Uisneno kun, hit Uisneno kun talantia nabal-bal. In mes antopu kit talantia nabal-bal.”