Read Uab Meto SIT PULES 5 Bible Online

SIT PULES 5 - Uab Meto bible

SIT PULES 5

¹Neu atopu sit sin. Nok a'bae feku. Sit Pules Nai Daud.

²Koi UISNENO, amnen fa au uab molok sin, ma mutnin ale au sakoit sin.

³Muupab au totis ma amtuntaku kau, koi au Kesel ma au Uisneno.

⁴Natuin al neu Ko au usaeb au onen totis, koi UISNENO, amnen au onen totis anbi nok-noka. Anbi nok-noka au eki au tulu', ma au pao Ho han taes, koi UISNENO.

⁵Ho Uisneno, Ho kam lomi fa maufinu. Atoni amaufinut ka nabe'i fa hen haumak Ko.

⁶Ho kam nek mamun fa hem kiso atoni nek anaeb, ma Ho kam lomi fa atoni le anmo'e bulalu.

⁷Ho mule'un atoni-atoni le anlomi lasi poi, afulit ma abulalut Ho munebet mani sin.

⁸Mes natuin Ho manekam le nae le'uf kun, nabe'i au tam anbi Ho Ume. Au li'tu anbi Ho Ume knino, ma nok nek aknino, au u'bes neu Ko.

⁹Koi UISNENO, sin le anmusu nok kau amfau le'uf! Amtuntaku kau he nati' au mo'e ani Ho lomim, ma muton neu kau lanan le au he nao utuin.

¹⁰Au musu sin uab sin mes ka masimo fa, natuin sin nekan nahenu nok tenab maufinu. Sin uab min oni ma nahelan, mes sin nekan nahenu nok punu'.

¹¹Amkas sin, koi Uisneno, maut he nati' sin namle'u natuin sin tenab al maufinu anmes kun. Mu'lob sin natuin sin sanat namfau, ma sin anmalaban nalali nok Ko.

¹²Ma maut he nati' ale atoni le nafnek neu Ko sin namlil ma na'ba' tal nabal-bal. Muneo ma muhafo ale atoni le sin nek Ko, he nati' sin namlil natuin Ko.

¹³Natuin Hom fe mani tetus neu atoni le na'ki' anbi Ko, ma Ho muneo ma muhafo sin meki Ho manekam.