Read Uab Meto SIT PULES 51 Bible Online

SIT PULES 51 - Uab Meto bible

SIT PULES 51

¹Neu atopu sit sin. Sit Pules le Nai Daud

²antui nani leka mafefa knino Nai Natan nabokan in natuin in anmapaisa nok bi Batsyeba.

³Amnek mumnau kau koi Uisneno, natuin Ho amanekat Ko, natuin Ho manekam le anaek Hom nose mani au sanat sin.

⁴Amboe mani ale au maufinu; ma mu'knino kau na'ko au sanat sin.

⁵Natuin au tebes ulali au elet tanhais sin, au ka nikan fa au sanat sin es amsa'.

⁶Al neu Ko, au usanab ulali, ma au mo'e sa' le Ho mutenab maufinu. Es nanet namneo leka Hom kas kau, ma Ho fekat nane amneot kun.

⁷Namneo, au amaufinut kau, na'ko tabu nahonis kau, ma au usanab ulali na'ko tabu na'apus kau.

⁸Hom toti nek muti' es nanet; muhenu au nekak meki nek ahinet.

⁹Mu'knino kau he nati' au knino kau; ma Hom boe kau he nati' au muti' kau nesin abas.

¹⁰Maut he nati' au utuin neu Ho beno alekot, he nati' au nekak naklati ma au u'ba' ateni.

¹¹Kais mumnau au sanat sin, ma amnose mani au elet tanhais sin.

¹²Mu'knino au nekak, koi Uisneno, ma mufe'un au nekak he au tam nok nek a'ki'at.

¹³Kais ampolin kau na'ko Ho matam, ma kais Ho maiti mani Ho smana knino na'ko kau.

¹⁴Anmo'e kau he umlil natuin honis le au simo na'ko Ko, ma mufe'un au nekak he au u'ki ubalah anbi Ko.

¹⁵Es nanet au mes unoina teni Ho plenat sin neu atoni asanat, he nati' sin anli' ma noebani nem neu Ko.

¹⁶Muskotun kau na'ko maten, koi Uisneno, au afetin, es nanet mes nok malinat au etun Ho amneot.

¹⁷Koi UISNENO, amtuntaku kau anbi uab sin, he nati' au pules u'naeb Ko.

¹⁸Ho kam lomi fa fua lolot; leka au u'tulu neu Ko fua mnotu, Ho kam simo fa.

¹⁹Tulu' neu Uisneno esle' nek aklati, nekaf le nabaunon ma na'pis Ho kam tite' fa.

²⁰Koi Uisneno, muton kau Ho alekot na'ko Sion, mufena mufani baik lape Yerusalem.

²¹Es nanet Ho mes amlomi ma amsimo mani fuat amneot, esle' fua mnotu, ma fuat le anfe nok tem-teme ma bijae keos molo mes na'tulu' neu Ko anbi baki tulu' in tunan.