Read Uab Meto SIT PULES 56 Bible Online

SIT PULES 56 - Uab Meto bible

SIT PULES 56

¹Neu atopu sit sin. Natuin Sit Pules: Kol ot kase amonot, na'ko pah a'lo. Natuin Nai Daud in sit pules leka atoni Filistin anheke in anbi pah Gat.

²Amnek mumnau kau, koi Uisneno, natuin au musu sin anmaken, nok kau ma na'susu' kau piut-piut.

³Sin le anlaban kau anteli naskuku' kau anbi neno teme; au musu sin antu'an ma namfau piut, koi Uisneno Amnanut Afin-finit.

⁴Au futnok neu Ko leka, au tam bi amtaus.

⁵Au pules u'naeb Ko Uisneno natuin Ho fef bela; au ufnek neu In, es nanet au mes ka umtau fa, natuin mansian ka nane'o fa anbi au matak.

⁶Au musu sin napenub au lasi, ma sin nami lanan piut he nale'un kau.

⁷Sin nabuabok anbi bale tolo', ma ankiso ale sa' le au mo'e ani, ma in namo sona he na'mate kau.

⁸Anmu'i ka fetin na'ko sin maufinu? Oin sin mes anmaten ka anbi Ho to'as in nanan, koi Uisneno!

⁹Hom so'i mulali neno-neno le sin anli'u kau, ma Ho muhin mani au matak oen in a'naen. Ai Ho mes kam so'i mani sin fa ka?

¹⁰Anbi neno le i au toti Ko, he nati' mu'lob au musu sin, natuin au uhin neu Uisneno anpes nok kau.

¹¹Au pules UISNENO natuin In fef ba'an le anta'en nalali.

¹²Au ufnek neune, es nanet au ka umtau fa, natuin mansian hen mo'e sa' neu kau.

¹³Au mes utis au manta'en neu Ko, koi Uisneno, ma u'tulu' fuat naeb neu Ko.

¹⁴Fun Ho es mufetin au monik na'ko maten, Hom panat kau ma au ka mofu fa. Es nanet nabe'i au moni anbi Uisneno In human, anbi In meusinen hen tana ale au monik.