Read Uab Meto SIT PULES 57 Bible Online

SIT PULES 57 - Uab Meto bible

SIT PULES 57

¹Neu atopu sit sin. Natuin sit hanan: Kais mule'un. Sit Pules na'ko Nai Daud, leka in naen antam neu nuat he naninbon na'ko Nai Saul.

²Amnek mumnau kau, koi Uisneno, amnek mumnau kau, natuin au uneo ma uhaoftok anbi Ko. Au u'tolo' anbi Ho ninem In mafon, talantia nautus le anfoi nane nasnas.

³Au sanane neu Uisneno Amnanut Afin-finit, neu Uisneno le anlek neu kau.

⁴In natae kau na'ko neno tunan, ma nafetin kau; In anli'u atoni-atoni le na'susu' kau. Uisneno mes naton nak In antuntaku kau nok a'ki'at, ma In anek kau piut.

⁵Au musu sin anfun natef kau, sin onle' meo asu amnah mansian. Sin nisin onle' suni ma as'anef, sin man onle' suni a'aikat.

⁶Koi UISNENO, muton Ho be'im anbi neno tunan, ma Ho apinat anbi pah pinan funam natef.

⁷Au musu sin antao kleot neu kau, ma naskuku' au matanik. Sin anhani bola' anbi au lanan, mes sin anmofu anmes kun anbi in nanan.

⁸Au haek umep anbi palsait, koi Uisneno, au umep anbi palsait, au he pules u'naeb Ko.

⁹Amfen nai hoi au smanak! Amfen biol ma heo! Au he ufena' manas in pinan.

¹⁰UISNENO, au he u'naeb Ko anbi ale uf-uf. Anbi ale to mansian, au he si sit pules neu Ko.

¹¹Natuin Ho manekam nane naek antia neno tunan, ma Ho a'ki'at nane antia nope sin.

¹²Koi Uisneno, muton Ho be'im anbi neno tunan, ma Ho apinat anbi pah pinan funam natef.