Read Uab Meto SIT PULES 58 Bible Online

SIT PULES 58 - Uab Meto bible

SIT PULES 58

¹Neu atopu sit sin. Natuin sit: Kais mule'un. Sit Pules Nai Daud.

²Hoi ale ana' aplenat, hi mimneo ka anbi hi fekat? Hi mifek mansian lasi nok amneot ka?

³Ai hi ka mitenab fa amle'ut, ma hi mo'e lasi susu' anbi pah le i.

⁴Atoni amaufinut sin ansek nalali anbi tabu na'apus sin ma sin a'monin anbi kake' anbi tabu nahonis sin.

⁵Sin neki laso onle' kaun kisao in lason, ma sin an sun sin luken onle' kaun le'u atono

⁶le ka nen fa atoni ahinet sin hanan, ai amnanet ahinet sin hanan.

⁷Koi Uisneno, muipu sin nisin ok-oke, ambok mani meo asu sin konin, koi UISNENO.

⁸Maut he nati' sin namneku onle' oe le nasum, ma onle' as'anef le namu'ub nani.

⁹Maut he nati' sin onle' panbu'u le namnoe, ma onle' li'ana le anmate nahun na'ko in nit meusine.

¹⁰Sin anmate nalali nahun na'ko sin matan natfai, onle' kisan le fe no mate ma fe ka na'nae fa ma anin natpeneb nani, onle' senat ma luat ametos.

¹¹Atoni amneot mes anmalin, leka sin nit ankas amaufinut sin, ma sin anboe sin haen anbi atoni abulalut sin na'.

¹²Atoni mes na'uab nak, “Namneo atoni amneot napeni upa', namneo, Uisneno mes anlefi mansian pah pinan sin lasi.”