Read Uab Meto SIT PULES 59 Bible Online

SIT PULES 59 - Uab Meto bible

SIT PULES 59

¹Neu atopu sit sin. Natuin sit: Kais mule'un. Sit Pules Nai Daud, leka Nai Saul anlenu atoni ma anpanat in ume he nati' na'mate in.

²Koi Uisneno, mufetin kau na'ko au musu sin, muneo muhafo kau na'ko atoni le anmaken nok kau.

³Mufetin kau na'ko atoni le anmo'e maufinu, ma musoni kau na'ko alolot sin.

⁴Amkiso sin nem ma na'eka' he na'mate kau, atoni abulalut sin nabua ma anlaban kau; mes au ka mo'e fa sanat ai ka mo'e fa elet tanhais, koi UISNENO.

⁵Ka natuin fa au sanat, es nanet sin naloitan ma anhake pasan-pasan.

⁶Amfen nai, Uisneno Amnanut Afin-finit, amtuntaku kau, koi Uisneno Israel, mail ames kum. Amfen ma amkas ale uf-uf, ma kais amnek atoni amaufinut le anmo'e amle'ut.

⁷Anbi neno mabe sin anfain, neman ma ma nakon onle' asu ma anfun natef kot.

⁸Sin naslaet ma nakle'at piut; sin uab sin na'aik onle' suni, sin natenab nak kan mu'i fa atoni le anen sin.

⁹Mes Ho manis sin, koi UISNENO, ale uf nane Ho musi'u sin.

¹⁰Hom fani au be'it matani, es nanet au ufnek nai Ko, Hom fani au bale pesit, koi Uisneno.

¹¹Natuin In alekot au Uisneno nane nem neu kau, ma In nafetin kau he kiso neu au musu sin naenan.

¹²Kais mu'mate sin, koi UISNENO, he nati' au to sin kais sin nikan nani. Mu pe' sin ma amli'u mu'aenab sin meki Ho kuasat, koi UISNENO, hai aneot ahafot.

¹³Natuin sin nasanab anbi sin uab; maut he sin maheke anbi sin leka moko, natuin sin anlomi sukat ma poi.

¹⁴Mu'mate sin anbi sin to'as nanan, koi Uisneno, mu'mate sin talantia namnekun. Ma ale atoni mes nahin nak Uisneno es naplenat to Israel, ma In plenat nane anfun natef pah pinan.

¹⁵Leka anbi neno mabe sin anfani neman, ma sin ma nakon onle' asu anfun ma natef kot.

¹⁶Sin anao ma neman he nami mnahat, ma nakunut leka sin ka namsenan fa.

¹⁷Mes au si natuin Ho matanim; anbi nok-noka au si nok han a'aikat natuin Ho manekam ma Ho matakum. Natuin Hom fani on bale pesit, bale au uneo ma uhafo anbi tabu leka au u'eku ok nukat.

¹⁸Koi Uisneno, au abe'it, au usaeb sit pules neu Ko, natuin Hom fani au bale pesit, koi Uisneno, le au nek ani.