Read Uab Meto SIT PULES 6 Bible Online

SIT PULES 6 - Uab Meto bible

SIT PULES 6

¹Neu atopu sit sin. Nok a'bae heo ma biol. Natuin sit nono fanu. Sit Pules Nai Daud.

²UISNENO, kaisa Ho muniona' kau anbi Ho to'as In nanan, ma kais Hom kas kau anbi Ho maunu In nanan.

³Amnek Ho ate kau koi UISNENO, natuin au ulali au nenuk, ma mumepan kau natuin au oel.

⁴Au nekak antakman; Ho mufetin kau talantia leka, koi UISNENO?

⁵Amfain amu nai, koi UISNENO, ma mufetin kau, muhoni kau natuin Ho manekam.

⁶Natuin anbi nopu maten ka namnau Ko fa anteni; kan mu'i fa neu he nati' na'naeb Ko anbi nopu naukel.

⁷Au ole natuin au sakoit; ma au kae anbi ale fai talantia au hala tupa' napet.

⁸Au matak nanipu' natuin nu'ut, ma ankakin natuin ale au musu sin.

⁹Miskotun kau, hoi atoni-atoni amaufinut, natuin UISNENO In nen nalali au han kaet.

¹⁰UISNENO In nen au totis ma ansimo au onen.

¹¹Au musu sin mes naskeken ma anmae ma sin mes nali'ok nok nek ti'as.