Read Uab Meto SIT PULES 64 Bible Online

SIT PULES 64 - Uab Meto bible

SIT PULES 64

¹Neu atopu sit sin. Sit Pules Nai Daud.

²Koi Uisneno, amnen mani au onen totis anbi tabu au unukbok, mufetin au smanak na'ko musu le neki hakataus.

³Ampanat kau na'ko buat atoni abulalut, ma na'ko atoni-atoni amaufinut sin tenab amle'ut.

⁴Sin man na'aik onle' suni, ma sin napoitan uab maunu onle' as'anef.

⁵Na'ko sin bale tolo' sin napoitan uab poi, ma ka nok fa nek amtaus sin na'akan atoni le ka nasanab fa.

⁶Sin ana' natau tenab amaufinut, ma sin na'uab hen ta'on a'lau'; ma anbi sin tenab kan mu'i fa esle' nit sin mo'et.

⁷Sin natenab maufinut, ma na'uab nak, “Hai makusan lasi leok le'uf.” Nekaf ma taos mansian natol'on, ma ka nahine fa.

⁸Mes Uisneno naklaon In as'anef neu sin, ma sin napeni papa' nok askeken.

⁹Sin anmaten natuin sin uab anmes kun; sin anki'un nakan leka sin nit.

¹⁰Nok nane ale atoni namtau; nok nane sin natenab Uisneno In mepu ma sin an etun Uisneno In mepu.

¹¹Es nanet atoni amneot sin mes namlil, natuin UISNENO In mepu. Sin mes naneo ma nahaftok anbine; ma atoni nek muti' sin anmalin.