Read Uab Meto SIT PULES 65 Bible Online

SIT PULES 65 - Uab Meto bible

SIT PULES 65

¹Neu atopu sit sin. Sit Pules Nai Daud. Sit knino.

²Namneo hai mes ampules Ko anbi Sion, koi Uisneno, ma mitis mani hai fef bela neu Ko.

³Natuin Hom nen mulali hai onen totis; ale atoni nem neu Ko natuin sin nasanab nalali.

⁴Au sanat sin ma'fen le'uf neu kau, mes Ho es amsako sin.

⁵Ua alekot neu atoni le Hom beti mulali, ma Hom boin in he na'maika' anbi Ho Ume. Mes Ho mumsenab kai meki ale lasi alekot anbi Ho Ume, Ho sonaf knino.

⁶Ho mutae kai ma Hom fe neu kai lasi mnisat, Ho mo'e ale lasi amkakat he mufetin kai! Ale pah ma antia tasi a'lot, nafnekan neu Ko.

⁷Nok Ho matanim Ho muhakeb ale tubu, he muton Ho kuasat ma Ho be'im.

⁸Ho musnasab tasi in a'lun ma oki in maunu, ma Ho mu'tena' pah-pah sin aslutun.

⁹Ale mansian pah pinan namtau ma na'bes neu Ko, leka sin nit Ho mo'et anaek sin. Pah pinan funam natef na'ko in tu'an antia in tu'an Ho mo'e sin na'ba' ma namlilan.

¹⁰Afu le Hom panat ma Hom fe mani ulan, Ho mumliaba' talantia napoitan in nesan nok athoes. Ho muhenu ale noe meki oe, Ho muloitan mnahat neu sin, namneo Ho es muloitan mani ale sa'-sa'.

¹¹Hom fe oe neu afu le na'foi nani ma Ho muklati tana-bua sin. Ho muneo mani meki ulan, ma Ho mumonib utan he nasuni ma napae nok amliat.

¹²Natuin Ho alekot, anbi ton-ton Ho muloitan mnahat, anbi me le Ho amu anbine nane anmu'i athoes.

¹³Bibi ma bibi kase nahenu anbi mnela snaen, es nanet ale nu'af sin anmalin.

¹⁴Mnela-mnela nahenu nok bibi kase, ma nonof sin nahenu nok aen kase. Sin al sin na'ba' ma ansi nok malinat.