Read Uab Meto SIT PULES 68 Bible Online

SIT PULES 68 - Uab Meto bible

SIT PULES 68

¹Neu atopu sit sin. Sit Pules Nai Daud.

²Uisneno anfen ma nasana' In musu sin, atoni le na un to'an neu In naen na'ko In matan.

³Uisneno anli'u na'aenab sin, onle' anin anfu naneku ai masu. Onle' nini' ansai anbi ai, onane amsa' atoni amaufinut sin namneku na'ko Uisneno In matan.

⁴Mes atoni nek muti' sin anmoni nok malinat, sin na'ba' nok malinat anbi Uisneno In matan.

⁵Amsi sit knino neu Uisneno, ma ampules In kanan, miloitan lanan meunuan neu In le antoko anbi nope in fafon. In kanan nane UISNENO — mimlil nai anbi In matan.

⁶Uisneno le anbi In Ume knino anfani amaf neu li'anmanat ma In anpesi bife banu sin.

⁷Uisneno naloitan bale neu atoni anukat; ma nafetin atoni o'of talantia sin namlilan. Mes atoni-atoni le anlaban UISNENO of natua anbi pah ametos.

⁸Koi Uisneno, tabu le Hom topu Ho to ma anfinin mnela ametos,

⁹pah pinan an nainun, ma ulan naek ansanu anbi Ho, matam natuin Uisneno Sinai, Uisneno Israel, na'noebon nem.

¹⁰Ho musanut ulan nok athoes, ma mule Ko afu ametos.

¹¹Ma Ho to na'maika' anbine; koi Uisneno, Hom panat atoni amamu'it meki Ho matakum.

¹²UISNENO naplenat, es nane ale bife neki a'at nak:

¹³“Kesel sin nok sin meo pukan sin naenan!” Sin naen onle' kol ot kase natpen kun. Ale bife anbi ume sin anbati noni, muti' ma mnatu le nabelak nani sin. Uisneno In to sin anbe'u, maski nak amnokat makenat sin ka namfau fa.

¹⁵Leka Uisneno Akuasat Afin-finit nape' ale kesel sin anbi bale nane, sen-sene ansanu na'ko Tubu Salmon.

¹⁶Tubu Basan nane tubu abe'it, tubu le in nu'af sin namfau.

¹⁷Nansa' na'ko nu'af namfau nane ho mail nok nek tinos neu Tubu Sion le Uisneno anbeti anfani on In bale toko'? UISNENO mes na'maika' anbine tal nabal-bal.

¹⁸Uisneno nem natonon neu sin nok In apinat anbi In aklet amatanit nifun-nifun.

¹⁹UISNENO mes na'noebon anfani; anbi bale amnanut neki atoni pa'an. In mes ansimo fuat na'ko ale mansian ma na'ko atoni aspiti; he nati' sin nabua nok UISNENO.

²⁰Ampules UISNENO, natuin In kun Uisneno afe honis neu kit, na'ko neno nao neu neno In ansutai hit baut sin.

²¹Hit Uisneno esle' UISNENO afe honis, In nafetin kit na'ko maten.

²²Uisneno mes naskuku' hit musu sin nakan, ma sin mes na'maika' anbi sanat in nanan.

²³UISNENO nakua a'an nak, “Hoi Au to, Au mes eki hi musu na'ko Basan, Au eki sin anfani nem na'ko tasi ametak,

²⁴he nati' him boe hi haem meki sin na', ma hi asu sin nahan talantia sin namsenan.”

²⁵Koi Uisneno, Hom be'u sin ma sin mes nit ma nahin, Au Uisneno, au Kesel, sin mes nauban Ko anbi Ho toko'.

²⁶Asit sin antom mat, a'bae heo antom kotin; fetnai a'biso tufu sin anbin atnanan; ma sin ansi nak:

²⁷“Ampules nai Uisneno anbi to tnanan, ampules UISNENO hoi ale Nai Yakub in sufan!”

²⁸Benyamin, uf le na'bau nesin sin, in nao anbi matan, nalali te amnasit-amnasit Yehuda sin natuin ma amnasit na'ko uf Zebulon ma Naftali sin anbin kotin.

²⁹Uisneno antoti ho be'im ma ho matanim, koi Uisneno, mumepan lasi le Ho muton neu kai.

³⁰Kesel sin nekin fuat neu Ko anbi Ho Ume Yerusalem.

³¹Munoina' Mesir, meo asu anbi atfo in nanan. Munoina' uf-uf, bijae pukan nane nok in ana sin, le anmabe'un es nok es he nasikan noni muti'. Uisneno musiteb pah-pah le anlomi makenat.

³²A'naet sin na'ko Mesir nem ma neki noni molo. Atoni Sudan nekin fuat neu Uisneno.

³³Amsi sit knino neu Uisneno, hoi ale pah, amsi sit pules neu UISNENO,

³⁴neu In le an nesin neno tunan na'ko ahun-hunut. Mitnin! UISNENO nakua a'an, In hanan na'tai onle' lotos.

³⁵Mitebes kuasat Uisneno le naplenat Israel, In kuasat nane antia neno tunan.

³⁶Namneo, hit Uisneno naton amkakat leka In na'noebon nem na'ko In balan. Israel sin Uisneno anfe kuasat ma be'it matani neu In to. Uisneno kanan mapules!