Read Uab Meto SIT PULES 72 Bible Online

SIT PULES 72 - Uab Meto bible

SIT PULES 72

¹Na'ko Nai Salomo. Koi Uisneno, munoina' Ho plenat sin neu kesel, muton Ho amneot sin neu naimnuke.

²So in anlefi Ho to sin lasi natuin Ho plenat, ma anpainote anukat sin nok amneot.

³So hai pah nahenu nok athoes, ma Ho amneot nane natonon anbi ale uf-uf sin.

⁴So kesel anfani alef lasi amneot neu to a'baut, ma antuntaku atoni amanukat sin ma naskuku' a'susu' sin.

⁵So nati' in anhake nabalah anbi ale batan, leka manas ma funan anbine.

⁶So in onle' ulan le ansanu anbi mnela, ma onle' ulan le ansai ma napet ale lene.

⁷So Ho amneot nane anpe' ma nao piut anbi ale batan, ma Ho athoes nane natonon leka funan fe anbine.

⁸In plenat nane mes anmeunua na'ko tasi antia tasi bian, ma anhainon na'ko neno saen antia neno tesan.

⁹Amaika abit mnela snaen mes na'bes neu in ma musu sin mes anli'tu anbi in haen.

¹⁰Kesel-kesel Tarsis ma ale pah-pah mes neki tulu' neu in. Kesel-kesel Arab ma Etiopia sin nem ma neki tnatas.

¹¹Ale kesel mes an olbes anbi in matan, ale pah mes anfani in ate.

¹²Natuin in nafetin atoni anukat, ma atoni amamu'it le antoti neu in.

¹³in nek atoni amamu'it ma to a'baut, ma In nafetin atoni le na'nuka' anbi in monin.

¹⁴In nafetin sin na'ko ha'mu'it, natuin sin monit nane maupa neu in.

¹⁵Ua alekot neu kesel! So nati' na'tulu' neune mnatu na'ko Arab. So nana'at in anbi onen totis anbi ale tabu ma anlomi hen simo nani.

¹⁶So aen kase nane nathoe anbi pah in nanan funam natef, ma in tubu sin nahenu nok pah in afan. So in afu nane ma'afa onle' Nuaf Libanon, ma athoes anbine antu'an ma nao piut onle' hun anbi mnela.

¹⁷So nati' namnau kesel in kanan nane tal nabal-bal. In apinat nane antu'an ma nao piut leka manas fe anbine. So ale pah antoti hen fe neu sin tetus onle' in, ma ale atoni antek ua leko neu in.

¹⁸Pules liatas neu UISNENO, atoni Israel sin Uisneno, al In kun es anmo'e ale lasi le neki amkakat.

¹⁹Ampules In kanan knino ma naek tal nabal-bal; so pah pinan nahenu nok In apinat. So ale lasi an mot onan. Amin!

²⁰Nai Daud, Nai Isai in anah an onen onane.