Read Uab Meto SIT PULES 73 Bible Online

SIT PULES 73 - Uab Meto bible

SIT PULES 73

¹Sit Pules Nai Asaf. Uisneno nane nek mamun neu In to, ma neu atoni nek muti'.

²In namepan kau leka au fnekat na'beko',

³natuin au nek tinon atoni neka' moko, leka au it atoni amaufinut in monin naleok.

⁴Natuin sin kan toman fa menas, sin aon anmatanin ma an aominan.

⁵Sin kan toman fa anbi nukat, ma kan toman fa nu'ut onle' atoni bian.

⁶Es nanet sin an neka' naebok anbi sin monit, ma an nek menan anbi sin monin.

⁷Bulalut nahenu anbi sin nekan; sin anmoni nok tenab-tenab amle'ut.

⁸Sin na'si'u ma na'akan, ma nok neka' moko sin nakle'at atoni anukat.

⁹Sin nakle'at Uisneno anbi neno tunan, ma sin napoiba atoni-atoni abit pah pinan,

¹⁰talantia Uisneno In to natuin sin, ma ansimo sin uab.

¹¹Sin na'uab nak, “Uisneno ka nahin fa, Afin-finit kan tahan fa.”

¹²Atoni abulalut sin monin onane; sin monin nok alekot ma amaus ansato ma anao piut.

¹³Son-sona kalu au panat au nekak he muti' nabalah; ma ka maupa fa kalu au u'lon sanat.

¹⁴Natuin au nukat antoman kau neno teme; ma anhamu'i kau anbi nok-noka.

¹⁵Leka au u'uab onane te, au unebet ho anah sin batan.

¹⁶Mes leka au ami he nati' uhine, lasi nane ma'fen le'uf neu kau.

¹⁷Anbi amsopun au tam anbi Ume UISNENO, ma anbi nane amsa' au uhin monit atoni amaufinut in amsopun.

¹⁸Hom tao sin anbi lanan maeki, ma Ho mufetin sin natsel ma an maten.

¹⁹Ho muskuku' sin anbi smela, ma sin amsopun nane neki amtaus anaek.

²⁰Onle' mnitas namneku anbi nok-noka; leka Hom fen, koi UISNENO, sin namneku anfin kun.

²¹Leka au tam anbi olet ma lima'et, au nekak onle' naklati,

²²au mon ma ka uhin fa, au on mu'it anbi Ho matam.

²³Mes au haumak Ko piut, ma Hom na' au nimak ne'u.

²⁴Hom tuntaku kau ma munoina', kau ma Hom simo kau nok alekot.

²⁵Au le i Ho ini kun anbi neno tunan, al Ho kum es au lomi ani anbi pah pinan.

²⁶Maski nak au oel anbi aof ma smanaf, Hom fani on au kot matani, koi Uisneno; al Ho kum au in-ini talantia nabal-bal.

²⁷Atoni le nasaitan Ko mes namle'u, ma Ho mes mu'mate atoni le ka na'ki' fa neu Ko.

²⁸Mes neu kau, ua alekot neu atoni le anpaumak Uisneno. UISNENO anfani on kot matani, he nati' au ubeno' In mepu.