Read Uab Meto SIT PULES 74 Bible Online

SIT PULES 74 - Uab Meto bible

SIT PULES 74

¹Sit knino noina Nai Asaf. Koi Uisneno, Ho he musaitan kai piut ka? Nansa' es Ho muto'an Ho to piut?

²Mumnau Ho to le Hom beti mulali anbi ahun-hunut, to le Ho mufetin mulali ma anfani Ho in-ini. Mumnau Tubu Sion, le Ho mo'e anfani Ho bale tua'.

³Amnao mutuin bale le anfani on bale le natsel nalali; musu sin nale'un nani anbi Ho Ume.

⁴Musu sin na'ba' anbi Ho Ume, ma nahakeb pen-pene mnisat anbine.

⁵Sin onle' ase' hau le anfiti sin fani, he nati' nabelat ale hau anbi nasi.

⁶Ale hau mahuma musu sin nakpete' nani neki fani ma biso.

⁷Sin notu ma nanoeb Ho Ume, ma anhanisi Ho bale luli besa.

⁸Sin anlomi he nale'un kai, ma nale'un bale luli besa anbi hai pah.

⁹Mafefa knino ma takaf-takaf amkakat ka mamnita' anteni fa, ma kan mu'i fa esle' nahine antia leka anteni.

¹⁰Antia leka anteni, koi Uisneno, musu sin na'si'u Ko? Ai mes sin he na'akan Ko piut ka?

¹¹Nansa' es Ho kam tuntaku amteni kai fa? Nansa' es Ho kam seol kai fa?

¹²Hom fani hai kesel anbi ahun-hunut, koi Uisneno, Ho kum es amfe kai honis.

¹³Nok Ho matanim Hom beti oe tasi, ma mupe' kaun tasi in nakan.

¹⁴Ho muskuku' mani kaun le'u sin anakan Lewiatan ma Ho mo'e anfani mnahat neu atuas abit mnela snaen.

¹⁵Ho es mufaika' oe mata ma noe; ma Ho mumeto noe sin.

¹⁶Ho es amlek manas ma fai, ma amlek mani bale neu manas ma funan.

¹⁷Ho es amlek mani pah pinan in tu'an, ma Ho es amlek fauknais ma oe fat.

¹⁸Mumnau musu sin na'si'u Ko onme, koi UISNENO, uf le ka nahin Ko fa nakle'at Ho mau kanam.

¹⁹Kais muna'at Ho to neu atoni amaufinut sin niman. Kais amnikan Ho to sin monit piut.

²⁰Mumnau Ho fef bela, le Ho mo'e mani mok kai, natuin atoni na'susu' kai anbi ale bale mes'okan anbi pah le i.

²¹Kais mufetin atoni anukat sin namaebok, so atoni asusal ma amamu'it sin anpules Ko.

²²Amfen nai koi Uisneno, ma amlefi Ho lasi! Natuin atoni-atoni le ka nafnek neu Ko fa sin na'si'u Ko anbi neno tene'.

²³Kais amnikan Ho musu sin a'baf, ma sin le anlaban Ko sin matoes.