Read Uab Meto SIT PULES 75 Bible Online

SIT PULES 75 - Uab Meto bible

SIT PULES 75

¹Neu atopu sit sin. Natuin sit hanan: Kais mule'un. Sit Pules Nai Asaf. Sit knino.

²Hai miluli mibes neu Ko, koi Uisneno, hai minaeb Ko ma miton Ho mepu le neki amkakat.

³Uisneno nakua a'an, “Anbi tabu le Au lek ulali, Au mes lef ani hi lasi nok amneot.

⁴Leka pah pinan in nainun nok ale amonit, Au mes umepan ani ale in ni sin.”

⁵Au ak neu atoni-atoni le anlomi lasi poi, he nati' sin kais napoibon.

⁶Ma neu atoni amaufinut, he nati' kais sin namok'ok. Kais sin na'naebok ai na'uab nok nek amoko.

⁷Natuin ale lasi nane ka nem fa na'ko neno saen ai neno tesan ai ka na'ko fa bian a'ne'u ai bian a'li.

⁸Mes Uisneno anmes kun es anlefi sin lasi, In mes nanebet bian ma na'aiti bian.

⁹To'as UISNENO nane onle' klas noni mninut le anbi In niman nanan, klas noni nane natua neki tua' amafut. Uisneno mes anopan nani in nesan, ale abulalut sin ninu nani in nesan talantia nalali.

¹⁰Mes au of uton piut neu Nai Yakub in Uisneno, amsi sit knino neu In.

¹¹In mes na'ipu atoni amaufinut, sin matanin ma In mes namepan atoni nek amneot.