Read Uab Meto SIT PULES 77 Bible Online

SIT PULES 77 - Uab Meto bible

SIT PULES 77

¹Neu atopu sit sin. Natuin: Yeduton. Sit Pules Nai Asaf.

²Au onen neu Uisneno nok hana' naek; nok hana' naek au onen, ma In amnen kau.

³Leka au tam anbi as'unu au onen neu UISNENO; Au topan au nimak anbi fai teme ka nok fa haet, mes kan halin fa au nekak.

⁴Leka au mumnau Uisneno, au utiab au totis, leka au utenab, au nekak an oel piut.

⁵UISNENO anmo'e kau talantia au ka tup fa anbi fai, au aok an oel talantia au ka u'uab fa.

⁶Au utenab neu neno-neno afinit, au umnau ma utenab neu monit anbi ton-ton afinit.

⁷Au utenab anbi fai, ma au utan anbi au nekak nanan,

⁸“UISNENO mes antite kau piut ka, ma In kan lomi anteni kau fa ka?

⁹Ai In nas-nas nikan ma kan nekan teni kai fa ka? Nansa' es In ka natis fa In fef bela anteni?

¹⁰Ai Uisneno In nikan ma kan nekan teni kai fa? Ai In nato' talantia kan mu'i fa athoe neno?”

¹¹Es nanet au u'uab ak, “Le i es namenab au nekak, neu Uisneno Amnanut Afin-finit ka naplenat anteni fa.”

¹²Au he umnau Ho mepu sin, koi UISNENO, ma utenab ale Ho lasi amkakat anbi batan ahunut.

¹³Au he utenab ale lasi le Ho mo'e, ma utenab Ho mepu le naton amkakat anaek.

¹⁴Koi Uisneno, ale Ho mepu nane knino kun, sekau es anaek on hai Uisneno?

¹⁵Ho Uisneno le anmo'e lasi amkakat, Ho muton Ho plenat neu ale uf-uf.

¹⁶Nok Ho matanim Ho mufetin Ho to, le Nai Yakub ma Nai Yusuf sin sufan.

¹⁷Leka hai miaiti ma amkiso Ko, koi Uisneno, oe na'beko', ma tasi ametak anlilitai.

¹⁸Nope nasanut ulan, lotos naslutu', ma limat anpin anfun natef.

¹⁹Lotos naslutu', limat anpin, pah pinan na'beko' ma na'tai.

²⁰Hom nao mutuin okin, Hom lak amfin tasi, mes Ho nobim ka mamnita' fa.

²¹Hom tuntaku Ho to onle' atukus mese nao, natuin topus Nai Musa ma Nai Harun.