Read Uab Meto SIT PULES 78 Bible Online

SIT PULES 78 - Uab Meto bible

SIT PULES 78

¹Sit knino noina Nai Asaf. Mituin Au noina, hoi ale Au to, ampanat ale Au uab sin.

²Au u'uab eki ne ma leta, ma uton mnitas anbi batan ahunut,

³lasi-lasi le hai mnen ma haim simo, le hai na'if sin naton neu kai.

⁴Hai kam lomi he mitolo' sin fa neu hai anah sin; mes hai he miton neu batan amunit antom UISNENO In kuasat ma In mepu naek, ma In mo'et amkakat sin.

⁵In anfe nani plenat neu In to Israel, ma In naplenat Nai Yakub in sufan. In anlenu hit na'i sin he nanoina' sin anhenu. In nahakeb lasi amnauba neu Nai Yakub,

⁶he nati' batan amunit nahin In, ma ankakan anteni neu sin anhenu.

⁷Nak lasi nane sin mes na'pane sin monit neu Uisneno, ma kan nikan fa In mepu, mes sin of anpanat In plenat sin,

⁸he nati' sin monin kais on sin na'i sin le anlomi matoes ma bulalut; es nane sin nek ateb knino na'beko', ma ka na'ki'an fa neu Uisneno.

⁹Efraim in sufan in ana' aklaot ma as'anef, mes in naen leka antam anbi makenat.

¹⁰Sin an ele ma antanhai fef bela Uisneno nok sin, ma sin ka natuin fa In plenat sin.

¹¹Sin anikan In mepu sin, ma lasi amkakat le Uisneno naton neu sin.

¹²Uisneno naton lasi amkakat, anbi sin na'if sin, matan leko anbi Mesir, ma anbi mnela snaen Zoan.

¹³In anbati oe tasi, ma In nalakab sin; In nahakeb oe anfani baik lape.

¹⁴In naneo ma nahafo sin neki nope anbi manas ma In antana sin neki ai anbi fai.

¹⁵In nape' tub fatu anbi mnela snaen, ma In anfen sin oe nok athoes.

¹⁶In napoitan oe na'ko tub fatu, ma oe ansai onle' noe.

¹⁷Mes sin anmo'e sanat piut neu Uisneno, anbi mnela snaen sin anlaban Uisneno Amnanut Afin-finit.

¹⁸Sin ansu' Uisneno, ma antoti mnahat le sin ansali.

¹⁹Sin anlaban Uisneno ma na'uab nak, “Oin ai nabe'i Uisneno hen fe neu kit mnahat anbi mnela snaen ka?

²⁰Namneo In antepo tub fatu nok nek to'as, talantia oe anpoi naek. Mes nabe'i ka In he naloitan utunu' ma anfe sisi neu In to?”

²¹Leka Uisneno In nen lasi nane In nato' ma In nale'un In to neki ai, ma In to'as nane ansato piut.

²²Natuin sin kan palsai fa neu Uisneno, ma neu In kuasat le nafetin nani sin.

²³Maski onane amsa' In anfai neno tunan in eno-eno sin.

²⁴Ma nasanut aen kase na'ko neno tunan, ma mak muti' anfani on sin amnahat.

²⁵In anfe neu sin amnahat nok athoes; ma sin nah utunu' nok nek amlilat.

²⁶In nasanut anin na'ko neno saen; ma natuin In kuasat anin anfu natuin bian a'li.

²⁷In nasanut kolo-kolo neu In to, le amfaun namnes nok snaen ma sin amfaun ka maso'ik fa.

²⁸In nasanut kolo-kolo nane anbi sin um-ume, anfun natef bale le sin natua anbine.

²⁹Ma sin naiti ma sin nah talantia sin namsen, natuin Uisneno anfe nalali neu sin sa' le sin antoti.

³⁰Ma sin ka natis fa sin salit; leka sin fe antok ma sin nah,

³¹Uisneno nato' ma anlaban sin; In na'mate atoni munif ma amatanit na'ko atoni-atoni Israel.

³²Maski onane amsa' In to nasanab piut, sin nek afnekat ka nahelan fa maski nak anmu'i ale lasi amkakat.

³³Es nanet Uisneno nasopu sin monin onle' snasaf in anfu, sin uan nahenu nok amtaus.

³⁴Uisneno na'mate sin fauk-fauk anbi ale tabu, bian antofon ma anfani nem neu In.

³⁵Sin namnau nak Uisneno sin aneot ma ahafot, ma Uisneno Amnanut Afin-finit anesit es anfe neu sin lasi honis.

³⁶Mes sin napoiba In, sin uab nane luman kun.

³⁷Sin ka na'ki' fa neu In ma sin kan panat fa sin fef bela.

³⁸Mes Uisneno In nek sin ma ansako In to sin sanat, ma In ka nale'un fa sin. In antaku In to'as ma kan sukat sin fa.

³⁹In namnau nak sin amonit ma amates amsa', sin onle' anin anfun ma ankon nalali te kan fani nem fa.

⁴⁰Sin anlaban In anbi bi sin monin, anbi mnela snaen sin namenab In nekan.

⁴¹Sin ansu' Uisneno teni-teni, sin nasusab Uisneno Le Knino, Uisneno le atoni Israel.

⁴²Sin ka namnau fa In kuasat, ma neno le In nafetin sin na'ko sin musu,

⁴³leka In naton lasi amkakat anbi Mesir, ma anbi mnela Zoan.

⁴⁴Ale noe na'baina anfani na', talantia sin ka ninu fa oe.

⁴⁵In anhamu'i sin neki akbeo, ma nale'un sin nain neki be'o.

⁴⁶In nasanut kauna ma lamat, ma nale'un lene in nesan.

⁴⁷In nale'un tua' min kase in ta'un neki ul fatu, ma sin hau bubuk sin neki sen-sene.

⁴⁸In nasanut ul fatu hen pau sin mu'it, ma ken neno na'mate ale mu'it sin.

⁴⁹In an opan In to'as ma nasanut ahake le neki maten he nati' anhakatau sin.

⁵⁰In ka na'tolo' fa In to'as, ai anek sin monin, mes In nale'un sin neki men bono.

⁵¹In na'mate li'anmone unu na'ko atoni-atoni Mesir.

⁵²Es nane te In natuku In to, onle' pukan bibi kase, In antopu sin anao natuin mnela snaen.

⁵³In antopu sin anbi tainine ma kan mu'i fa amtaus, mes sin musu sin anlem anbi tasi nanan.

⁵⁴Es nanet In neki In to neu bale knino, neu tubu le In nis nalali.

⁵⁵In anli'u atokos bale nane anbi In to sin matan nalali te In anbati pah nane neu ale uf to Israel, In to, talantia sin natua sin musu sin um-ume.

⁵⁶Mes sin anmatoe ma ansu' Uisneno Amnanut Afin-finit, ma sin ka natuin fa In plenat sin.

⁵⁷Sin nek mamun on afi sin na'if sin, ma sin kan mu'in fa nek afnekat onle' klaot apenut.

⁵⁸Sin anlaban Uisneno ma na'luli na'besa' neu fatu le'u, ma hau le'u ma In nek tino sin neu hau mahuma mamasa.

⁵⁹Uisneno nato'an sin leka In ankiso lasi nane, es nanet In antite sin.

⁶⁰In nasaitan In Um-ume anbi Silo, bale In na'maika' anbi mansian sin atnanan.

⁶¹In nafetin In Peti Fef Bela he nati' sin neki anao; ma In musu sin nasik nan In taka' apinat.

⁶²In nato'an In to le In-ini kun, ma nafetin sin he na'mate sin neki suni.

⁶³Ale munif-munif notu sin neki ai; ma kan mu'i fa le he naiti sin anfeto.

⁶⁴Ale ana' fuat sin na'mate sin neki suni, es nanet bife banu kan kae ma kan kulu fa.

⁶⁵Es nanet UISNENO anfen onle' atoni le anfen na'ko In tupas, onle' atoni abe'it le ninu nalali tua' min kase.

⁶⁶In antepo na'aenab In musu, ma In anli'u sin tal nabal-bal.

⁶⁷Mes In antite Nai Yusuf in sufan, ma In ka beti fa Nai Efraim in sufan.

⁶⁸Le In anbeti nani esle' uf Yehuda, ma Tubu Sion le In anek nani.

⁶⁹Nafena' In Ume onle' In natua anbi neno tunan, ma onle' pah pinan anhake na'ki' nabal-bal.

⁷⁰In anbeti Nai Daud In ate ma naiti in na'ko mu'it sin atnanan,

⁷¹na'ko bale In anpanat bibi kase ainaf, he nati' natuku Israel In to knino.

⁷²Nai Daud anpanat sin nok nek muti', ma in antopu sin neki hine.