Read Uab Meto SIT PULES 79 Bible Online

SIT PULES 79 - Uab Meto bible

SIT PULES 79

¹Sit Pules Nai Asaf. Koi Uisneno, to le ka nahin Ko fa antoko natau Ho pah pusaka. Sin anhanisi sin Ho Ume, ma sin ankon nakua Yerusalem.

²Sin nasaitan Ho ate sin nitu anfani mnahat neu kolo-kolo abit neno tunan. Atoni le Hom nek mani sin, sin nitun mapolin ma anfani mu'i fui sin amnahat.

³Anbi kot Yerusalem funam natef an opan sin na' onle' oe, ma ka tit fa es ansub sin.

⁴Pah-pah le anhaumak nakle'at kai, sin anmanis ma na'si'u kai.

⁵Koi UISNENO, Ho mes muto'an kai piut ka, ma Ho nek tinos neu kai anpin onle' ai ka?

⁶Mu'opan Ho to'as neu pah. Pah le ka nahin Ko fa, ma neu kesel-kesel le ka na'luli na'bes neu Ko.

⁷Natuin sin nale'un nani Ho to, ma naklati sin bale tupa'.

⁸Kais amkas kai natuin hai na'i sin sanat. Amnek kai, natuin natuin hai ma ole.

⁹Amtuntaku kai, koi Uisneno, hai afetin, amsako hai sanat sin ma amsoi man kai natuin Ho knino Ko.

¹⁰Kais mufetin atoni bian natan neu kai, “Sin Uisneno nane es me ka?” Maut he nati' hai mit seunbanin neu pah-pah le na'mate Ho ate-ate sin.

¹¹Amnen han sakoit abit pa'an sin, so nati' atoni le anlek he na'mate sin, Ho mufetin in meki Ho kuasat.

¹²Koi UISNENO, amseunbanin ale pah-pah hae hitu no hitu natuin sin nanebet Ko.

¹³Nok nane Ho to kai, Ho bibi kase le Ho mutuku, hai minaeb Ko tal nabal-bal, ma ampules Ko na'ko batan nao neu batan.