Read Uab Meto SIT PULES 80 Bible Online

SIT PULES 80 - Uab Meto bible

SIT PULES 80

¹Neu atopu sit sin. Natuin sit: Uk-uki sufan. Sit Pules saksit Nai Asaf.

²Koi Atukus Israel, amnen kai, Ho es amtopu Nai Yusuf in sufan on pukan bibi kase. Ho es amtok anbi ahake sin fafon, Ho mutonom nok Ho apinat,

³anbi Efraim matan, Benyamin ma Manasye. Muklile Ho kuasat neu kai, ma munoebom amu he mufetin kai.

⁴Koi Uisneno, muloitan kai; ampainote kai meki Ho matakum, he nati' hai mipeni aomina.

⁵Koi UISNENO Akuasat Afinit, Ho mes muto'an kai talantia leka anteni, maski nak Ho to an onen?

⁶Hom fe kai kulut kaet anfani on amnahat, ma hai matnu anfani on amninut.

⁷Ho mufetin ale pah-pah anmatoen hai pah ma hai musu sin anmanis kai.

⁸Koi Uisneno Akuasat Afin-finit, muloitan kai; ampainote kai meki Ho matakum, he nati' hai mipeni aomina.

⁹Ho to onle' uf tua' min kase le Ho manani' na'ko Mesir. Ho muskotun pah bian, ma Hom sen hau nane anbi sin pah.

¹⁰Ho muloitan afu neune, es nanet in a'ba'an antam ma anlaba funam natef pah.

¹¹In namafo ale tubu, ma in atlaen ankub hau bubuk naek.

¹²In atlaen anlaba antia Tasi Tnana, ma in tunan makuke antia Noe Efrat.

¹³Koi Uisneno, nansa' es Ho mu'belat in baki, talantia atoni nao natuin ma anseu in fuan.

¹⁴Faif fui ansoban talantia namle'u, ma mu'it abit mnela nah nani.

¹⁵Koi Uisneno Akuasat Afin-finit, amkoenom amu, amtae kai mu'ko neno tunan ma ampainote Ho to.

¹⁶Mufetin Ho to onle' uf tua' min kase le Hom senan ma le Ho mumepan in tunan makuke.

¹⁷Musu anse' ma notu nani in; maut he nati' sin namle'un natuin Ho to'as.

¹⁸Ampanat atoni le Hom beti mani, anah mansian le Ho mumepan mani.

¹⁹Es nanet hai mes kam heo' misaitan Ko fa; ampanat hai monit, es nanet haim pules Ko.

²⁰Koi UISNENO Akuasat Afinit, muloitan kai, ampainote kai meki Ho matakum, he nati' hai mipeni honis.