Read Uab Meto SIT PULES 83 Bible Online

SIT PULES 83 - Uab Meto bible

SIT PULES 83

¹Sit Pules Nai Asaf: Sit knino mese.

²Kais mumne'bom neu kai, koi Uisneno, kais ma au Ho nimam ma kais mu'ten'om.

³Amkiso Ho musu sin bekon, ma atoni-atoni le an unto'an neu Ko sin musu.

⁴Sin nami lanan he namofu Ho to; ma sin nabua hen laban atoni-atoni le Ho muneo ma muhafo.

⁵Sin na'uab nak, “Aim he taskuku' tani to Israel, he nati' sin kanan kais mateka anteni.”

⁶Ale pah sin nabua, ma sin nek mesen hen laban Ko:

⁷pah Edom ma Ismael, atoni-atoni Moab ma Hagar;

⁸pah Gebal, Amon, ma Amalek, pah Filistea ma atokos abit Tirus.

⁹Ma Asyur amsa' nabua nok sin, anfani haef nimaf Nai Lot sufan.

¹⁰Anmo'e sin onle' atoni Midian, onle' Sisera ma Yabin anbi Noe Kisyon,

¹¹le male'un anbi Endor, ma anfani naet neu afu.

¹²Anmo'e sin atopus sin onle' Oreb ma Zeeb, mumaeb sin anakaf sin onle' Zebah ma Salmuna,

¹³natuin sin na'uab nalali nak, “Aim he hit atoko tatau Uisneno In bale.”

¹⁴Koi Uisneno, amkifun sin on afu, onle' aen ut le anin natpeneb nani.

¹⁵Onle' ai notu nasi, onle' tubu-tubu anputu natuin ai in pinan.

¹⁶Amli'u sin meki Ho to'as, ma muskeken sin meki Ho maunu.

¹⁷Koi UISNENO, maut he sin masi'u, he nati' sin nahin Ho kuasat.

¹⁸Maut he nati' sin namaebok piut ma namtau, maut he nati' sin anmate anbi nu'ut in nanan.

¹⁹Maut he nati' sin nahin al Ho kum Uisneno Amnanut Afin-finit, UISNENO es muplenat pah pinan.