Read Uab Meto SIT PULES 86 Bible Online

SIT PULES 86 - Uab Meto bible

SIT PULES 86

¹Onen totis Nai Daud. Amnen au onen totis, koi UISNENO, ma mutae kau, natuin au anukat ma a'olet kau.

²Ampao ma amtitu kau, natuin au nek Ko, mufetin Ho ate kau natuin au ufnek neu Ko.

³Ho au Uisneno, es nanet amnek kau, koi UISNENO, natuin au onen neu Ko anbi neno teme.

⁴UISNENO, amhalin Ho ate kau au nekak, natuin au upanen au monik al neu Ko.

⁵Ho nek mamun Ko, koi UISNENO, ma Hom lomi lasi sako sanat, atoni le an onen neu Ko, Hom nek in piut meki makenat athoes.

⁶Amtai au onen, koi UISNENO, amnen kau natuin au sakoi ma toti he Hom bab kau.

⁷Leka au tam bi as'unu, au onen neu Ko, natuin Ho es mutae kau.

⁸Koi UISNENO, kan mu'i anteni fa es on Ho, kan mu'i fa es hen mo'e sa' le Ho mepu.

⁹Ale to le Ho mo'e mes nem neu Ko, koi UISNENO, he nati' na'luli na'bes neu Ko ma anpules Ho apinat.

¹⁰Natuin Ho abe'it ma amatanit Ko, Ho es amoe lasi amkakat, al Ho kum es Uisneno Ko.

¹¹Munoina' kau Ho lomim, koi UISNENO, he nati' au utuin Ko nok a'ki'at, mu'knino man au nekak.

¹²Au u'naeb Ko eki au nekak oke, koi au UISNENO, au he pules u'naeb Ko tal nabal-bal.

¹³Natuin Hom nek kau piut meki Ho manekam le anaek ma Ho es mufetin au smanak na'ko nopu maten.

¹⁴Koi Uisneno, atoni neka' moko anfen ma anlaban kau, atoni abulalut sin he na'mate kau; ma sin na'upab kau fa.

¹⁵Mes Ho kum, koi UISNENO, Uisneno amanekat ma nek mamun, nek halan ma nek mahoe.

¹⁶Ampanat kau ma amnek kau, mumepan kau ma mufetin kau, natuin on au aina, au amsa' ululi ma u'bes neu Ko.

¹⁷Amfe kau taka' Ho manekat, koi UISNENO, he nati' atoni le nek nanan kau sin namaebok, leka sin nit neu Ho mufetin ma amhalin kau.