Read Uab Meto SIT PULES 88 Bible Online

SIT PULES 88 - Uab Meto bible

SIT PULES 88

¹Sit knino es. Sit Pules uf Korah. Neu atopu sit sin. Natuin sit hanan: Mahalat Leanot. Sit knino noina Nai Heman, atoni Ezrahi.

²Koi UISNENO, au Uisneno afetin, au saksi neu Ko anbi manas, ma au haumak Ko anbi fai.

³So nati' au onen totis antia Ko, ma Ho mutae kau anbi au sakoit.

⁴Nukat anaek antoman kau; maten antia ume nesun.

⁵Au on atoni le mes antam neu nopu maten, natuin nalali in matanin.

⁶Nasaitan kau anbi atoni amates, sin atnanan, natupa' kau onle' atoni amates, anbi nopu in nanan, onle' atoni manikan, ma le Ho kam tuntaku mite fa.

⁷Hom polin mutam kau neu bola' amnanut, ma neu nopu maten le namnaun ma names'ok.

⁸Ho to'as nane na'meku kau nok ma'fena, Ho muklati kau meki Ho maunu.

⁹Ho mu'lob au soba sin na'ko kau, ma sin anlelan kau. Au oeb anok ma ka utonok fa,

¹⁰ma au matak namsab natuin nek nu'ut. UISNENO anbi ale neno au toti neu Ko, au ubuab au nimak ma onen neu Ko.

¹¹Ai Ho mo'e amkakat neu atoni amates ka? Ai sin mes anfenan ma anpules Ko?

¹²Ai mes sin naton Ho manekam anbi nopu naukel, ma Ho matakum anbi bale maten?

¹³Ai mes anmu'i he nahin Ho lasi amkakat sin anbi mes'okan in nanan, ai Ho alekot anbi bale le atoni anikan nani?

¹⁴Mes au toti hem tuntaku Ko, koi UISNENO, au usaeb onen totis neu Ko anbi nok-noka.

¹⁵Koi UISNENO, nansa' Hom tite' kau? Nansa' es Ho kam halin amteni kau fa?

¹⁶Leka au fe u'bau anbi ahunut maten antae kau piut, au nuka' natuin sutai nukat na'ko Ko.

¹⁷Ho to'as nane anaek ma naklati kau, Hom laban kau nok ma'fena he mule'un kau.

¹⁸Ho to'as nane on noe sak, ma anfun natef kau anbi neno teme.

¹⁹Au soba sin le anhaumak kau Ho mu'lob sin na'ko kau, al mes'okan anfani on au soba.