Read Uab Meto SIT PULES 89 Bible Online

SIT PULES 89 - Uab Meto bible

SIT PULES 89

¹Sit knino noina Etan, atoni Ezrahi.

²Au he si natuin Ho athoe neno, koi UISNENO, au he etun Ho matakum nane na'ko batan noe neu batan.

³Natuin au uhin neu Ho manekam nane tal nabal-bal, ma Ho matakum nane na'ki' on neno tnanan.

⁴Ho mukua Ho a'am, “Au mo'e ulali Au fef bela ok atoni le Au beti ulali. Au aiti' ulali supat neu Nai Daud au ate:

⁵‘Au mes utau Ho toko' nane tal nabal-bal, na'ko batan nao neu batan, ma ho anah sin mes antok natau nani.’ ”

⁶Ahake neno tunan anpules Ho mo'et amkakat sin, ma ansi Ho matakum, UISNENO.

⁷Anbi neno tunan kan mu'i fa es on Ho, koi UISNENO, amonit anbi neno tunan ka tit fa es on Ho.

⁸Atoni knino sin na'luli na'bes neu Ko, ma namtausan Ko nesin ale sa' le anfun natef Ko.

⁹UISNENO Akuasat Afinit, sekau es nabe'i on Ko? Ho mutis ale lasi, koi UISNENO.

¹⁰Ho muplenat tasi amnanut, ma mumneb in okin le anfoe.

¹¹Kaun le'u ma kaun le'u tasi, Ho muskuku' ma mu'mate, ma nok Ho nukum akuasat Hom li'u ale musu.

¹²Neno tunan ma pah pinan nane Ho ini kun, Ho es amepu mani pah pinan nok in nesan.

¹³Ho es amlek ma amlulu neno kabenan a'li ma a'ne'u, Tubu Tabor ma Hermon na'ba' nok amlilat neu Ko.

¹⁴Ho kuasat nane naek kun, ma Ho be'im nane matani kun.

¹⁵Amneot ma kasat nane anfani tu'in neu Ho plenat, manekam ma matakum nane natonon anbi Ho mo'et.

¹⁶Ua alekot neu pah le na'luli na'besa' neu Ko nok amlilat, le na'oinson anbi Ho pinam, UISNENO.

¹⁷Anbi neno teme sin namlilan ma anhake na'ki'an, natuin Ho matakum.

¹⁸Hom fen sin amnisat nok ma oket, natuin Ho matakum nane hai mis milali.

¹⁹Natuin atoni le Hom beti es naneo ma nahafo kai, koi UISNENO; hai kesel nane Uisneno Knino Israel sin ini.

²⁰Anbi ahun-hunut anmu'i mnitas mese, Ho mukua Ho a'am neu Ho ate le na'ki' neu Ko, “Au tuntaku ulali meo pa'e mese, atoni mese na'ko to le Au u'aiti.

²¹Au u'eku ok Au ate Nai Daud, ma Au umepan ulali eki mina buat neno naek.

²²Au mes uneo ma uhafo in eki be'it ma matani, ma Au hatani in eki Au kuasat.

²³Musu mes ka nis fa in, ma atoni amaufinut mes ka na'susu' fa.

²⁴Mes Au ule'un in musu sin, ma mes Au u'mate sekau le an un to'an neu in.

²⁵Au mes anek in nok a'ki'at, ma uhenu in eki kuasat.

²⁶Au mes meunuab in plenat, na'ko Tasi Tnana antia Noe Efrat.

²⁷In mes na'uab neu Kau, ‘Au Ama es Ko, au Uisneno, au aninit ma au afetin.’

²⁸Au mes amoe in anfani Au naimnuke unu, le anaek anesin ale usif.

²⁹Au mes anek in talantia nabal-bal, ma mes Au umepan Au fef bela ok in.

³⁰Au mes utua in atoko leka neno tunan fe anbi pah pinan in fafon, ma na'ko batan nao neu batan in upuf sin mes natua pah pinan nane.

³¹Mes leka in anah-anah sin antanhai Au plenat, ma ka natuin fa Au lekat sin,

³²ma sin kan mo'e fa sa' le Au lek ma lulu ani, ma kan na' nahel fa Au plenat sin.

³³Au mes a'kas sin eki ue natuin sin tanhais, ma Au fe neu sin amle'ut natuin sin sanat-sanat sin.

³⁴Au mes anek Nai Daud, ma Au ka hel fa Au manta'en na'ko in.

³⁵Au mes ka hel ufani fa Au fef bela ok in, ma Au ka aiti' ufani fa Au manta'en.

³⁶Nak Au kanak le knino, Au aiti' supat no mese tal nabal-bal, ma Au ka umolok fa uab poi neu Nai Daud.

³⁷In atoko nane anhake nabal leka manas fe anbin, in upuf sin na'ko batan nao neu batan sin mes natua pah nane.

³⁸In plenat nane mes nabalah onle' funan, anfani saksi a'ki'at anbi nope-nope.”

³⁹Mes anbi tabu le i Ho muto'an usif, Hom polin ma Hom tite' atoni le Hom beti mulali.

⁴⁰Hom eka Ho fef bela mok Ho ate, ma in sobe plenat Hom polin neu klofo in nanan.

⁴¹Ho mu'belat baki lape anbi in kot sin, ma Ho mutkuab mani in kot sin.

⁴²Ale atoni le sin nao natuin nane sin nasik nan in amaus, in aon bian sin nakle'at nani in.

⁴³Hom fe mnisat neu in musu sin, ma sin le anlaban in sin namlilan.

⁴⁴Hom mo'e sin kenat ka maota' fa, Ho kam tuntaku fa in anbi makenat.

⁴⁵Ho musopu in plenat nok malinat, ma Hom polin in atoko plenat neu afu.

⁴⁶Hom ketu in uan tabu in munif, ma Hom amu in meki nek mae.

⁴⁷Antia leka anteni Ho mu'tol'om mu'ko kau, koi UISNENO? Ho to'as le anpin on ai nane antia anteni leka?

⁴⁸Mumnau kau natuin au uak na'pal, Ho mepu mansian anfani amonit le mes anmate.

⁴⁹Sekau es mes anmoni piut ma kan mate fa? Sekau es mes nafetnon na'ko nopu maten?

⁵⁰Koi UISNENO, Ho taka' amanekat ahun-hunut in es me ka? Le natuin Ho matakum amta'en mani neu Nai Daud?

⁵¹Mumnau kau koi UISNENO, Ho ate kau le i upeni si'u, sutai akan na'ko pah amfaun.

⁵²Ho musu sin nakle'at usif le Hom beti mani, koi UISNENO, anbi me le in nao natuin sin na'si'u in.

⁵³Pules nai UISNENO talantia nabal-bal. Maut he nati' anbol onane! Amin!