Read Uab Meto SIT PULES 9 Bible Online

SIT PULES 9 - Uab Meto bible

SIT PULES 9

¹Neu atopu sit sin. Natuin Nai Mut-Laben in hanan. Sit Pules Nai Daud.

²Nok au nekak oke au he u'naeb Ko, koi UISNENO, ma he uton Ho mepu le neki amkakat.

³Au he umlil ma u'ba' natuin Ho ma au he pules u'naeb Ho kanam, koi UISNENO Anesit Afinit.

⁴Anbi Ho humam ma Ho matam au musu sin anfain kotin ma sin naenan; sin natsel ma sin anbel ma sin anmaten.

⁵Natuin Ho muplenat on alef lasi amneot ma amnonot; ma Hom fani on au amnes lasi.

⁶Hom kas mulali ale uf-uf ma mule'un ale atoni amaufinut; ma sin manikan tal nabal-bal.

⁷Ho mule'un mani hai musu sin, ma Ho muskuku' mani ale sin kot sin; ma kan mu'i teni fa he sin namnau nani.

⁸UISNENO es naplenat talantia nabal-bal; In nahakeb nani In toko' plenat he nati' anlefi pah pinan in lasi.

⁹In naplenat uf-uf nok amneot ma anlefi sin lasi nok amneot.

¹⁰UISNENO nane bale neot ma hafot neu atoni asutai ha'mu'it, In anfani on bale pesit leka sin anbi ma'lenat.

¹¹Atoni le in nahin Ko anfutun in nekan neu Ko, koi UISNENO, Ho mes ka musaitan fa atoni le na'luli ma na'bes neu Ko.

¹²Pules miliatas UISNENO le naplenat anbi Sion! Ma etun ma miton In mo'et sin neu ale uf-uf.

¹³Natuin In namnau atoni asusal sin ma In ka nikan fa sin sakoit; ma In mes ankas atoni le anmo'e susu'.

¹⁴Amkiso nai, au musu sin nasusab kau; koi UISNENO mufetin kau na'ko nopu maten,

¹⁵he nati' au u'naeb Ko anbi atokos Yerusalem sin matan. Au mes u'ba' nok malinat natuin Ho mufetin kau.

¹⁶Uf-uf le ka nahin Ko fa sin anmofu neu bola' le sin anhani anmes kun; sin antam akleot le sin antao nani.

¹⁷UISNENO nalil'on natuin In fekat amneot. Atoni amaufinut anmofu natuin in mo'et anmes kun.

¹⁸Atoni amaufinut nasopu in monin anbi nopu maten, ma neu uf-uf le ka namtausan fa Uisneno amsa'.

¹⁹Atoni amamu'it mes ka manikan fa talantia nabal-bal; ma atoni a'nuka' kan moin fa piut nok fnekat.

²⁰Amfen nai, koi UISNENO, amlefi lasi neu ale uf-uf, kais mufetin mansian he na'naebon.

²¹Namaut he nati' sin namtau, koi UISNENO, ma sin anbe'an ma antebes nak namneo sin mamnaiti' na'ko afu.