Read Uab Meto SIT PULES 90 Bible Online

SIT PULES 90 - Uab Meto bible

SIT PULES 90

¹Nai Musa, ate Uisneno in onen totis. Koi UISNENO, Ho es amfani hai bale neot ma hafot na'ko batan nao neu batan.

²Nahun na'ko Ho he mo'e mani ale tubu, ma nahun na'ko Ho he mepu pah pina, Ho es Uisneno ko nabal-bal, le kan mu'i fa ahunut ma amsopun.

³Ma Ho mufani mansian neu in uf, anfani afu on afi unun.

⁴Anbi Ko ton nifun mese nane anfani neno mese, afi neno le in anfin, onle' lekat neu paot anbi fai.

⁵Ho mueki kai onle' numnait; onle' hun le anbo;

⁶anbi nok-noka in nasuf, mes anmaknene anbi neno anmabe.

⁷Ho muskeken kai meki Ho to'as, ma Ho mule'un mufin kai meki Ho maunu.

⁸Hom tao hai sanat sin anbi Ho matam, hai sanat sin le natol'ok, Ho mit mani sin.

⁹Hai uam na'pal natuin Ho to'as, ma ale hai ton sin namsopu onle' asnasaf in fun.

¹⁰Hai uam ala ton bo'hitu, ma leka hai mibe'i ton bo'fanu. Mes al susal ma nukat es hai mipeni; leka hai misopu hai uam le na'pal, hai mimneku amfin kun.

¹¹Sekau es nahin Ho kasat In maunun, ai an naben Ho to'as In amnekan?

¹²Oin hai mihin ai kahaf neu hai uam na'pal he nati' haim fani atoni nek leko.

¹³Koi UISNENO, Ho mes muto'an kai antia leka anteni? Moebaniom ma amnek mufani Ho ate kai.

¹⁴Mu'opan Ho manekam neu kai anbi nok-noka, he nati' anbi hai monim hai malin ma amsi ampules Ko.

¹⁵Amfe neu kai halinat namnes nok hai nukat, le haim sutai anbi ton-ton ma'ne'at.

¹⁶Muton Ho mepu neu Ho ate kai, ma Ho kuasat neu hai sufam.

¹⁷Koi hai UISNENO, amfe tetus, neu ale hai mepu sin le naton in nesan.