Read Uab Meto SIT PULES 92 Bible Online

SIT PULES 92 - Uab Meto bible

SIT PULES 92

¹Sit knino neu Neno Snasat.

²Namneo alekot kun kalu hai minaeb Ko, koi UISNENO, ma ampules Ko, Uisneno Amnanut Afin-finit;

³ma etun Ho manekam anbi nok-noka, ma Ho matakum anbi fai,

⁴nok bae' biol, leko ma heo.

⁵Natuin Ho mo'et nane anhalin au nekak, es nanet au si nok malinat natuin Ho mepu.

⁶Ho mo'et-mo'et sin nane naek kun, koi UISNENO, ma Ho tenab-tenab nane amnanu kun.

⁷Atoni amonot nane ka nahin fa, ma atoni nek manu nane kan heke fa.

⁸Atoni abulalut nane mes anmoni nok amliat onle' hun, ma atoni amaufinut nane in mu'in; nane ansato ma nao piut mes sin namle'u kun,

⁹natuin Ho, UISNENO Akuasat Ko tal nabal-bal.

¹⁰Hai mihin, Ho mule'un mani Ho musu sin, koi UISNENO, ma mes Ho musiteb atoni amaufinut sin.

¹¹Hom fe kau be'it ma au upeni matani on bijae fui, ma Hom fe kau tetus nok athoe neno.

¹²Au it au musu sin naenan, atoni-atoni le anfen ma anlaban kau, ma atoni amaufinut sin salit au nen ulali.

¹³Atoni nek muti' in monin on noah u'es, ma anmoni nok amliat on aijo anbi Libanon.

¹⁴Sin onle' hau le masena anbi Ume UISNENO, ma anmoni namlia anbi hit Uisneno In Ume.

¹⁵Leka in namnasi in fe naton fuan, of in namlia ma no mate kun.

¹⁶Le nane anfani taka' nak UISNENO amneot; In aninit, le ka tit fa apenut anbi In.