Read Uab Meto SIT PULES 94 Bible Online

SIT PULES 94 - Uab Meto bible

SIT PULES 94

¹Koi Uisneno, Ho Uisneno aseun banit Ko, muton neu kai Ho seun banit, koi UISNENO.

²Amfen nai, koi Alef lasi pah pinan, amkas atoni-atoni neka' naeb namnes nok sin mo'et.

³Koi UISNENO, atoni amaufinut nae sin malinat antia anteni leka ka? Antia anteni leka ka, koi UISNENO?

⁴Sin napoitan uab si'u, ma nok neka' naeb sin na'uab neu sin maufinu.

⁵Sin na'susu' Ho to, koi UISNENO, ma sin anteli atoni-atoni le Hom beti.

⁶Sin na'mate bife banu ma li'anmanat, ma atoni anao mnemat le natua anbi pah le i.

⁷Sin na'uab nak, “UISNENO ka nit sin fa, Nai Yakub in Uisneno kan panat sin fa.”

⁸Hoi au to, kais hi mon onle' nane, minoina hem pake hi hine.

⁹Uisneno es anmo'e hi lukem, ai In ka nen fa ka? In es anmo'e mataf, ai In ka nit fa ka?

¹⁰In es nanoina' ale to, nansa' es In he kan kas fa sin ka? In es anfani anoina neu ale atoni, ai In kan mu'i fa nek hine ka?

¹¹UISNENO, es nahin tenab mansian, In nahin ale lasi nane son-sona kun.

¹²Ua alekot neu atoni le Ho munoina' in, koi UISNENO, atoni le Ho munoina' Ho plenat sin.

¹³Hom oe teneb in leka in antam anbi neno-neno amle'ut sin, talantia amhani bola' hem heke atoni amaufinut sin.

¹⁴UISNENO ka nasaitan fa In to; In mes kan polin fa In mu'in.

¹⁵Anbi neno lef lasi Ho muhakeb Ho plenat sin, ma ale atoni nek muti' mes natuin nani sin.

¹⁶Sekau es mes nesi kau na'ko atoni abulalut? Ma sekau es mes anhake nok kau hen laban atoni amaufinut sin?

¹⁷Oin bait UISNENO hen kan tuntaku kau fa, oni au tam ulali anbi atoni amates in balan.

¹⁸Anbi tabu au utenab ak au mes amofu, Ho manekam, UISNENO, anfiti kau ma au haek umep.

¹⁹Leka au ole ma limae, Ho mumela kau ma amhalin kau.

²⁰Ho ka mubua fa mok alef lasi amle'ut sin, le natenab amle'ut ansukin anbi lasi plenat.

²¹Sin nek mesen ma anlaban atoni nek muti', ma na'mate atoni le ka nasanab fa.

²²Mes UISNENO nane anfani on au alef lasi amneot, ma Uisneno nane anfani aneot ma ahafot neu kau.

²³Sin ankas atoni amaufinut namne natuin sin mo'et amle'ut, ma In na'umut sin fefan natuin sin sanat. Hit UISNENO mes anpoi sin fefa.