Read Uab Meto SIT PULES 96 Bible Online

SIT PULES 96 - Uab Meto bible

SIT PULES 96

¹Amsi sit fe'u neu UISNENO! Amsi sit knino neu UISNENO, hoi ale pah pinan alki.

²Amsi sit knino neu UISNENO, ma ampules In; amsaksi ma miton nai In beno amlilat nane mak In nafetin nalali kit.

³Miton In apinat nane neu ale pah-pah, ma In mo'et-mo'et amkakat sin neu to mansian.

⁴Natuin UISNENO naek kun, ma In mapules kun, so mamtausan anesin ale uis pah.

⁵Uisneno teta pah bian anmo'e na'ko hau mahuma, UISNENO es anmepu nani neno tunan.

⁶In nahenu nok anaet ma apinat, In Ume nane nahenu nok kuasat ma amasat.

⁷Pules UISNENO, hoi ale to mansian, ampules In anaet ma abe'it matani kun!

⁸Ampules In kanan le aknino kun, ma meki fuat neu In Ume.

⁹Miluli mibesa neu UISNENO meki bale pake luli besa! Amli'tu nok amtaus anbi In matan, hoi pah pinan nok in nesan!

¹⁰Mibeno In a'an neu ale pah-pah, “UISNENO nane Kesel kun! Pah pinan le i anhake namep ma ka naktuli fa; In mes anlefi lasi neu to sin nok amneot.”

¹¹Mimlil nai, hoi neno tunan ma pah pinan! Mislutu nai hoi tasi nok in nesan oke!

¹²Mimlil nai, hoi ale mnela nok ale amonit masena! Ale hau abit nasi sin alsin mes na'ba'.

¹³Natuin UISNENO nem ma naplenat anbi pah pinan, In mes anlefi ale to sin lasi nok amneot ma amnonot.