Read Uab Meto SIT PULES 97 Bible Online

SIT PULES 97 - Uab Meto bible

SIT PULES 97

¹UISNENO nane Kesel kun! Es nanet pah pinan so hi mimlil, ma ale bale-bale hi mimoek.

²Nope ma mes'okan an aumnan In; amneot ma lasi plenat nane anfani tu'in neu In plenat.

³Ai anpin anbi In matan, ma notu nani musu le anfun natef In.

⁴In pinan nane antana pah pinan, pah pinan anlilitai leka sin nit In.

⁵Tubu-tubu nane noe onle' nini' anbi UISNENO, In matan, ma ana' aplenat abit pah pinan sin matan.

⁶Neno tunan an etun In amneot, ma ale pah sin nit In apinat.

⁷Ale atoni le na'usi neu faut le'u ma hau le'u mes namaebok, ma sin nafnek neu bale ka maota' fa; ale usif mes na'luli ma na'bes anbi UISNENO In matan.

⁸Atokos abit Sion ma kot Yehuda sin namlil leka sin anen fekat UISNENO.

⁹Natuin Ho kum, koi UISNENO, Ho es amkuas pah pinan le i; Ho naek amnesin ale usif.

¹⁰Hoi hi le amnek UISNENO, so mai koit maufinu! Natuin UISNENO naneo ma nahafo In to sin monin, ma In nafetin sin na'ko atoni abulalut sin niman.

¹¹Meusine nane anbol neu atoni nek muti', ma amlilat neu atoni nek amnonot.

¹²Mimlil nai hoi atoni-atoni nek muti' natuin UISNENO In mepu, misaeb sit pules neu Uisneno knino.