Read Uab Meto AMSAL 1 Bible Online

AMSAL 1 - Uab Meto bible

AMSAL 1

¹Le i fainekat na'ko Nai Salomo le Nai Daud Kesel Israel in anmone.

²In salit esle' hen tuntaku atoni hen mo'e onme ka hen fani atoni nek ahinet, ma nahine lekat-lekat antom monit ma nahine ale uab ma a'at le in otan nanibun.

³Fainekat-fainekat le i nanoina anmone onme ka he nati' atoni anmoni anbi nek ahinet, amneot ma amnonot.

⁴Ansato ma nanoina atoni le lasi hine fe nabau, he nati' na aik anbi tenab, ma nanoina atoni munif anfani atoni ahinet, he namnasi anbi tenab.

⁵Nok fainekat-fainekat le i ansato anteni ahinet sin hine ma ansimo anteni topus.

⁶Nok nane sin mes nahine fainekat in nesan le naninbon, ma nahine uab ma a'at atoni nek ahinet ma ale lasi le sin naton nani.

⁷He nati' napeni noina amneot, ahun-hunut so atoni antuna ma namtausan UISNENO. Atoni amonot in mes ka naupab fa nek ahinet ma kan loim he matopu fa anbi noina.

⁸Hoi au anah ko, ampanat sa' le ho ama ma ho aina nak neu ko.

⁹Natuin sin noina nane ansato ho mo'et alekot anfani on bale amasat le antao anbi ho nekam ma nainub anbi ho to'am he namasab ho humam.

¹⁰Leka atoni asanat anpaiton ko, au anah ko, kais mutuin sin fulit le nane.

¹¹Leka sin na'uab nak, “Aum he tami atoni ma atmaban in, aum he tami ma tamate atoni le ka nasanab fa.

¹²Tabu le i sin anmonin nok amlilat ma aomina, mes ain of anfani on atoni le nasusbon.

¹³Hit tait sin bale maupa sin, he nati' hit ume nahenu nok bale masikat.

¹⁴Aum mutuin kau! He nati' hit bakan in upan nane atbati tamnes es nok es.”

¹⁵Au anah ko, kais mutuin atoni-atoni nane ma mu'lobom mu'ko sin.

¹⁶Sin mes kan tainine fa, leka sin fe kan mo'e fa lasi maufinu. Sin anlomi he nati' anmo'e taisibu.

¹⁷Maski kolo amsa mes kan tam fa natuin kle'o le antao nani,

¹⁸anbi in matan, mes atoni amaufinut sin natetu kle'o neu sin aon anmes kun — talantia sin antam anmes kun.

¹⁹Namneo, atoni le nami neu monit neki lasi susu', in mes ansoi nani neki in smanan anmes kun amsa.

²⁰Mitnin nai! Nek ahinet nane anboin ma no'en ki anbi ale lanan in anhunun anbi mnela-mnela.

²¹In nanoina anbi eno besi sin ma anbi bale-bale taiba:

²²“Hoi atoni-atoni nek manu! Hi mes mibalah anbi lasi nane tal leka anteni? Antia leka anteni hi minebet ma amtite lasi hine ma noina nane?

²³Amnen kau leka au ubokan ki, es nane te au mes uton au nekak neu ko ma unoina ko au lasi hine.

²⁴Au boin ulali ki, mes him tite ma hi kam lomi fa he mituin kau.

²⁵Him el ma amtanhai au fainekat ma him tite au noina.

²⁶Es nane te leka hi mitef mok amle'ut, au mes amanis ki. Leka him tam anbi lasi amtaus, au mes usi'u ki.

²⁷Namneo au mes usi'u ki leka hi mi oelbom, ma leka him tam anbi snama le antoman ki ma nem neu ki onle nautus.

²⁸Tabu le nane hi mes amboin kau, mes au ka utae ki fa. Hi mes mami kau anbi ale bale, mes hi mes ka mieku kau fa.

²⁹Hi mes onki atoni le ka napen nit fa lasi hine, es nane te hi ka mitnin fa UISNENO.

³⁰Hi kam lomi fa hem simo au fainekat sin ai kam panat fa au noina sin.

³¹Es nane, te hi mes amtamis ale hi mo'et ma hi tenab amle'ut sin upan.

³²Atoni amonot nane mes anmate natuin in kan nen kau fa, ma atoni amonot nane mes anmate natuin in ka naupab kau fa.

³³Mes atoni le in nen kau, mes anpanat in. In mes anmoni nok oetene ma in mes ka namtau fa.”