Read Uab Meto AMSAL 10 Bible Online

AMSAL 10 - Uab Meto bible

AMSAL 10

¹Le i fainekat Nai Salomo: Li'anmone ahinet le in amaf an nek nani; li'an amonot nasusab in ainaf nekan.

²Mu'if le mapeni ka natuin fa lanan amneot mes ka neki fa halinat natuin amneot nane es anfe honis.

³UISNENO of ka nafetin fa atoni amneot he namnah; mes In an eka atoni amaufinut sin monin, he nati' atoni nane kais napeni sa' le in sali nane.

⁴Atoni apehet mes antam anbi nukat, mes atoni amakoet mes anfani amu'it.

⁵Atoni ahinet mes anseki leka antia in etin, mes atoni le antup piut leka antia in etin, in namaeb in aon anmes kun.

⁶Atoni nek leko mes napeni tetus, atoni amaufinut in uab nahenu nok maunu.

⁷Tenab neu atoni nek leko nane anfani tetus, mes atoni amaufinut mes manikan.

⁸Atoni ahinet anlomi hen simo fainekat, atoni amonot anbi in uab mes ankiku ma ansek.

⁹Atoni amneot in monin namlil ma namoek, atoni le napoibon mes tahine anbi in molok.

¹⁰Sekau le natolo' amneot, mes susal anbolan in, sekau le antoti nok mat-mat, in nami athoes ma malinat.

¹¹Uab ma a'at atoni nek leko mes namlil anbi monit mes anbi atoni amaufinut in molok natolo' lasi hainisit.

¹²Un to'an napoitan matoes ma mabanat; mes nek manekat ansako nani sanat.

¹³Atoni le in tenab na'aik, in mes napoitan hinet ma anheke atoni amonot.

¹⁴Atoni nek ahinet anibun hinet, leka atoni amonot namolok, in nami he namofu in aon.

¹⁵Maus anpanat atoni amu'it, ma'nukat nane naskuku ma naklati atoni amamu'it.

¹⁶Leka hit mo'e alekot, in upan nane esle' moni nok malinat, ma leka atmo'e sanat, in amsopun nane sanat antu'an ma namfau piut.

¹⁷Sekau es ansimo au noina, in mes anmoni nok athoes, sekau le kan au fa in sanat, in anmoni anbi maten.

¹⁸Atoni le an un in to'an nok atol-tolo' nane anfani poiba. Atoni le nabeno anteni akan ma si'ut nane in anfani amonot.

¹⁹Ta'uab amfaun anteni, sanat mes atu'an ma nao piut, atoni le anpanat nan in man nane in anfani ahinet.

²⁰Molok na'ko atoni nek leko nane onle noni muti amneot; tenab na'ko atoni amaufinut ka maota fa.

²¹Molok atoni nek alekot, anfani tetus neu atoni amfaut sin; nek manu na'ko atoni amonot nane namate kun in aon.

²²Natuin tetus UISNENO atoni anfani amu'it, mepu naek kan sato anteni fa amaus.

²³Atoni amonot anlomi hen mo'e sanat; atoni nek ahinet anlomi he nami nek hine.

²⁴Atoni nek muti napeni sa' le in ansali; mes atoni amaufinut napeni sa' le in namtausan.

²⁵Atoni amaufinut nane namneku leka nautus antoman in, mes atoni nek muti nane in anhaek na'ki nabal.

²⁶Kais amlenu atoni apehet, fun in mes nato'ab kit onle lalu haef le anmaninub hit nisik ai onle ai masu le naseno hit matak.

²⁷Mubes neu UISNENO he nati' ho mupeni ua mnanu, natuin atoni amaufinut sin anmate leka sin tabu fe kan tia fa.

²⁸Na'ko fainekat neu atoni nek alekot mes anhalin in monin, mes fainekat atoni amaufinut nane in luman kun.

²⁹UISNENO naneo ma nahafo atoni amneot, mes nale'un nani atoni-atoni le anmo'e maufinu.

³⁰Atoni nek muti mes anmoni nok athoes, mes atoni amaufinut nane mes ka namaika fa anbi pah manta'en.

³¹Atoni nek muti namolok uab-uab hine, mes atoni amaufinut sin fefan mes ma'umut.

³²Atoni nek muti in uab sin neki halinat anbi hit nekak, mes atoni amaufinut in uab sin namenab nekak.