Read Uab Meto AMSAL 12 Bible Online

AMSAL 12 - Uab Meto bible

AMSAL 12

¹Atoni le nek ahinet nane in mes napeni bokan; atoni le kan lomi fa bokan nane atoni amonot.

²UISNENO anlomi atoni nek alekot, mes atoni le natenab maufinu nane mes ansimo kasat.

³Kan mu'i fa atoni mese le in hen malin piut anbi maufinu in nanan, mes atoni amneot nane mes anhaek piut, ma ka nabeko fa.

⁴Fenai nek leko nane neki halinat ma amlilat neu in mone. Fenai le namaeb in mone anfani men nuif le neku ma antam piut.

⁵Atoni amneot nane natenab lasi-lasi alekot, mes atoni amaufinut nane sin natenab lasi poi ma kake'.

⁶Atoni amaufinut sin uab neki laso mes atoni amneot in molok nane neki honis.

⁷Atoni amaufinut mes nastun ma natsel ma of in nobin ka natonon fa, mes atoni nek leko nane mes anhake na'ki na'ko batan nao neu batan.

⁸Atoni napeni pules natuin in nek hine, mes atoni mes manebet natuin in mono.

⁹Alekot anes leka atfani to ana le anmu'i mepu, na'ko atmo'e sok atfani anaet mes tanuka mnahat.

¹⁰Atoni nek alekot anpanat in mu'it; mes atoni amaufinut anhamu'i nani sin.

¹¹Atof lene le anmepu nok makoe napeni mnahat nathoe, mes atoni le anpolin tabu neu sa' le ka maota nane atoni amonot.

¹²Atoni amaufinut anlomi hen be'u atoni abulalut, mes atoni nek alekot sin monin onle hau mafua.

¹³Atoni amaufinut nakleo in monin neki in uab le in napoitan sin, mes atoni nek alekot nafetnon na'ko manukat ma hamu'it.

¹⁴Atoni mes-mese napeni naoina namnes nok in uab ma in mo'et; es-es ansimo namnes ma natai.

¹⁵Atoni amonot natenab nak in kan mu'i nit fa sanat, mes atoni nek ahinet anlomi hen simo fainekat.

¹⁶Leka atoni amonot mabokan tabu nane amsa in naton in nek amenat, mes atoni nek ahinet in ka nabeko fa leka in makle'at ma masi'u.

¹⁷Nabe'i tauab tak namneo atoni namepan amneot; ma nok poi ma kake' atoni-atoni naton susu'.

¹⁸Uab baun nane namenab nekaf onle napau neki suni; mes uab pailolit nane anfani malo le naleko amenat.

¹⁹Lasi poi mes natonon anbi smela, mes uab amneot nane anhaek nabal-bal kun.

²⁰Atoni le natenab maufinu anlomi lasi susu'; mes atoni le nami alekot nane of namlil.

²¹Atoni nek leko of kan tam fa snama, mes atoni amaufinut of antoman nukat piut.

²²UISNENO an un to'an neu apoiba sin, mes In nek atoni nek amnonot.

²³Atoni nek ahinet ka nanaebon fa; mes atoni amonot mes na'uab kun in monon.

²⁴Mepu nok matani anmo'e atoni ma ansimo kuasat; mes pehe nasesab atoni hen fani ate.

²⁵Nek olet naipu be'it matani, mes mahoe nane anhalin nekak.

²⁶Atoni nek leko in nis anesin in aon bian, mes atoni amaufinut ansek natuin in maufinu.

²⁷Tapehbok of ka tapeni fa sa' le hit sali, mes nek makoet atoni mes anfani amu'it.

²⁸Atoni le in nao natuin lanan amneot mes namlil anbi monit, atoni le in nao natuin lanan maufinu mes anta neu maten.