Read Uab Meto AMSAL 13 Bible Online

AMSAL 13 - Uab Meto bible

AMSAL 13

¹Li'ana ahinet of anpanat leka in amaf anfainek ma nanoina; mes atoni nek anaeb in kan lomi fa hen simo bokan.

²Atoni nek leko in uab sin neki mnisat, mes atoni a'asafanut anlomi lasi musu.

³Atoni le anpanat in molok in mes namne anbi in monin; mes atoni le nasi'u ma naakan mes antoman nukat.

⁴Apehet in anmu'i salit namfau, mes ka mese fa le in napeni; mes atoni le anmakoe anbi mepu of napeni sa' le in ansali.

⁵Atoni amneot an un to'an neu lasi poi, mes atoni amaufinut sin mo'et naton nek mae ma akan.

⁶Amnonot ma amneot nanono ma nahafo atoni le in monin namneo; maufinu nane naskuku atoni asanat.

⁷Anmu'i atoni le anmo'eson on amu'it mes in kan mu'i fa amaus, anmu'i le anmo'eson on amamu'it mes in atoni amu'it kun.

⁸So atoni amu'it napoitan noni he nati' in anmoni nok amneot; ma atoni amamu'it nafetnon na'ko maten.

⁹Atoni nek ateb knino onle pina le anlelok ma natnan; mes atoni amaufinut nane anfani on paku amates.

¹⁰Nek anaeb nanesan matoes ma mabanat, atoni nek ahinet anlomi hen simo noina.

¹¹Amaus le napeni ka nok fa haet in mes namneku labah; amaus le mabuab kle'o-kle'o mes ansato ma namfau piut.

¹²Leka salit ka natiabon fa nekak mes naspae, mes leka salit natiabon nekak nahenu nok amlilat.

¹³Atoni le nakle'at UISNENO In noina, mes nale'un in aon kun, atoni le natuin Uisneno In plenat mes ansimo in upan.

¹⁴Noina atoni nek ahinet anfani on amlilat in un, leka snama anbol, noina nane anfe ko honis.

¹⁵Atoni tenab alekot napeni pules, mes atoni le ka mapalsai fa of nanuka anbi monin.

¹⁶Atoni nek ahinet nane natenab nahun nalali te naton anbi monit, mes atoni amonot in naton in mono anmes kun.

¹⁷Atoni asanat malelu neu lasi amle'ut, mes atoni malelu le mapalsai mes naton in nesan.

¹⁸Atoni le kan lomi fa he manoina of anmamu'i ma nanuka, mes atoni le anpanat fainekat mes maupab.

¹⁹Amlilat kun leka tapeni sa' le hit atsali! Mes atoni amonot kan lomi fa he nasaitan maufinu.

²⁰Atoni le nabua nok atoni nek ahinet, mes anfani ahinet. Atoni le nabua nok atoni amonot, amle'ut of antoman sin.

²¹Lasi maten natuin atoni asanat piut, mes atoni nek leko napeni amlilat piut.

²²Atoni nek leko nasanut in amaus neu in anah ma in upuf, atoni asanat sin amaus mabela neu le sin monin nok nek amneot.

²³Afu luman nabe'i napoitan mnahat nathoe neu atoni anukat; mes susu' natonon afu nane ka mamepu fa.

²⁴Li'ana ka matepo fa, nane nak kat nek fa in, kalu mnek in, so amtepo in.

²⁵Atoni nek leko in anmoni nok athoes, mes atoni amaufinut nanuka anbi monin piut.