Read Uab Meto AMSAL 14 Bible Online

AMSAL 14 - Uab Meto bible

AMSAL 14

¹Nok nek hinet bife nafena nani ume, mes ume nane natsel natuin in mono amsa.

²Atoni amneot namtau ma nabes neu UISNENO, mes atoni le in monin ka namneo fa sin nakle'at In.

³Natuin in fefan atoni amonot nanaeb in aon; mes atoni nek ahinet in naneo ma nahafo in.

⁴Leka bijae molo kan mu'i fa, lene in ka manesa fa; nok bijae molo in matanin, atseki nok athoes.

⁵Saksi amneot in natae nok amnonot, mes asaksit le ka mapalsai fa in napoibon piut.

⁶Atoni nek amoko in mes kan fani fa ahinet, mes atoni ahinet nanoina ka nok fa susal.

⁷Kais amsoba atoni amonot; natuin in mes ka nanoina fa neu ko sa' es.

⁸Atoni ahinet nahin neu in mes hen mo'e onme, atoni amonot nane in mono es anfuli in.

⁹Atoni amonot in kan filoli fa in sanat sin masako ai kahaf, mes atoni nek alekot in ansali he in sanat sin masako.

¹⁰Nuka ai malinat nane mabela anbi nekak, mes atoni bian kan tamis nite fa.

¹¹Atoni nek leko in ume anhaek namep, atoni amaufinut sin ume mes natsel.

¹²Anmu'i lanan le namneo, mes anbi amsoput lanan nane anlul neu maten.

¹³Anbi mani in kotin anmu'i kaet; ma amlilat nane namsopu neki kulut ma kaet.

¹⁴Atoni amaufinut ansen maufinu in fuan, ma atoni nek alekot ansen fuaf alekot.

¹⁵Atoni amonot nafnek neu ale uab, mes atoni ahinet nanetbon anbi mo'et.

¹⁶Atoni nek leko anpanton ma na'lobon na'ko maufinu, atoni amonot nane na' ansae ma in namlil.

¹⁷Atoni ato'as in anmon anbi mo'et; mes atoni ahinet naton nek amnalan.

¹⁸Atoni le in ka nahin fa in anfani amonot; mes atoni nek ahinet nane in hinen mes ansato piut.

¹⁹Atoni amaufinut mes nabes neu atoni nek amneot, hen toti manekat na'kone.

²⁰Atoni amamu'it in soba mes kan lomi fa in, mes atoni amu'it in soba sin namfau.

²¹Sekau es nasi'u atoni bian in anmo'e sanat; sekau es in nek atoni anukat in mes namlil.

²²Sekau es nami alekot, in mes mapalsai ma atoni nabes neu in, sekau es natenab maufinu nane ansek anbi in lanan.

²³Anbi ale mepu nane anmu'i in upan. Uab poi anmo'e atoni ma anfani anukat.

²⁴Atoni ahinet mapules natuin in hinen, atoni amonot mahine natuin in mono.

²⁵Leka saksi mese antek amneot, nane in nafetin in smanan, mes leka in napoibon, in nakle'at in aon bian.

²⁶Atoni le nafnek neu UISNENO in moni nok athoes, ma in naneo ma nahafo in ini sin.

²⁷Uf neu malinat nane esle' amtaus neu UISNENO; ma lanan he talobok ta'ko maten.

²⁸Kesel nane in amlilat nauban natuin in to namfau, leka to kan mu'i fa in mes ka naplenat fa.

²⁹Atoni ahinet nane ka nato' fa labah. Atoni amonot kan eka nabe'i fa in to'as.

³⁰Nekaf le anhaek namep anhalin aok; at un to'ak nane anfani menas le neki maten.

³¹Sekau es in nek atoni anukat, in nabes neu in Uisneno; sekau le nasusu' atoni a'olet, in na'akan in Apakaet.

³²Atoni amaufinut namle'u natuin in maufinu, atoni alekot mapanat natuin in amneot.

³³Nek hine anbi atoni alekot in tenab, mes anlem anbi atoni amonot in tenab.

³⁴Amneot ma alekot naaiti pah mese in masan, mes sanat anmo'e pah mese nasi'u ma naakan.

³⁵Kesel namlil natuin in ameput sin hinen, mes in nato'an in ameput le ka nanaoba sin mepu.