Read Uab Meto AMSAL 15 Bible Online

AMSAL 15 - Uab Meto bible

AMSAL 15

¹Nok han taes malule, matoes of namne; han taes maputu of nafena to'as.

²Molok-molok atoni nek ahinet nane anhanoe atoni in nekan; molok-molok atoni amonot nahenu nok lasi mono.

³UISNENO nit ale sa' le anbol anbi ale bale; In anpanat ale alekot ma amle'ut.

⁴Molok-molok alekot ansato be'it ma matani, molok-molok le namenab nekaf naoleb salit alekot.

⁵Atoni amonot kan panat fa fainekat na'ko in amaf, atoni nek ahinet of anpanat fainekat.

⁶Anbi atoni alekot in ume anmu'i maus namfau; atoni amaufinut in mu'in nane of namneku natuin asnama.

⁷Molok-molok atoni ahinet nahenu nok noina, mes atoni amonot in tenab ka onan fa.

⁸UISNENO ansimo atoni nek alekot in onen, mes In nek nanan atoni amaufinut in atulu.

⁹UISNENO In nek nanan atoni apoiba in lanan monit, mes In nek atoni le nanaoba In lomin.

¹⁰Atoni amaufinut of napeni hamu'it; atoni le kan lomi fa hen simo fainekat of anmate.

¹¹UISNENO nahin atoni amates sin balan ma sin lanan; mo'e onme mansian in tenab nane natol'on na'ko In ka?

¹²Atoni le anlomi akan ma si'ut kan simo fa fainekat; in kan lomi fa hen toti lanan na'ko atoni nek ahinet.

¹³Nekaf le namlil anmo'e humaf anpin; nekaf le nasusbon naipu tenab alekot.

¹⁴Atoni nek ahinet mes nami noina; atoni amonot of nahaebon nok mono.

¹⁵Atoni le nasusbon so anmepu piut anbi in neno monit; mes atoni le anmalin of in namlil piut.

¹⁶Leka nesi amaus nane kle'o mes nok namtaus neu UISNENO, na'ko maus anaek mes nahenu nok nek ole.

¹⁷Leko nesi atbukae nok utan mes nahenu nok manekat, na'ko atbukae nok sisi aminat mes nahenu nok nek aktinus ma mato'as.

¹⁸Atoni le nato' labah mes napoitan matoes, mes atoni le nalan of neki halan.

¹⁹Atoni apehet mes antam piut anbi nukat, mes atoni amneot mes ka naeku nok fa nukat.

²⁰Li'ana ahinet of anhalin in amaf nekan, mes li'ana amonot ka naupab fa in ainaf.

²¹Lasi mono nane halinat neu atoni nek manu, mes atoni nek ahinet nane anmoni nok amneot.

²²Salit ka natiabon fa natuin ka nok fa tenab le namtas; salit nane natiabon leka atoni namfau anfe fainekat.

²³Uab-uab le natiabon namnes anbi in tabu, mes naton halinat.

²⁴Atoni ahinet in nao natuin lanan neu honis, ka nao natuin fa lanan ansanu neu maten.

²⁵UISNENO mes natseleb ume atoni nek amoko, mes In of anpanat bife banu in afu.

²⁶UISNENO nek nanan tenab maufinu, mes uab alekot anhalin In nekan.

²⁷Sekau es nameku in aon bian, in naskuku in ume nanan anmes kun. Sekau es in nek nanan noni poh fefaf in monin mes naleok.

²⁸Atoni ahinet natenab in uab sin; mes atoni amaufinut namolok uab amle'ut.

²⁹UISNENO ansimo atoni nek alekot in onen totis, mes in kan panat fa atoni abulalut.

³⁰Athuma mo'e anmina nekaf, humaf alekot nane anhalin smanak.

³¹Atoni le anpanat noina nane antam atoni ahinet.

³²Atoni le kan lomi fa hen simo fainekat, nane ka naupab fa in aon; atoni le anlomi hen simo noina nane mes anfani nek ahinet.

³³Amtaus neu UISNENO nane anfani sukit neu noina alekot; nek halan nane naubon na'ko nek baun.