Read Uab Meto AMSAL 16 Bible Online

AMSAL 16 - Uab Meto bible

AMSAL 16

¹Nabe'i mansian natenab ale salit, mes Uisneno es nafek nani

²Anbi kisot atoni nak in mo'et sin nane alekot kun, mes UISNENO es nahin kun salit anbi nekan.

³Mufnekan ho salit sin nane neu UISNENO, leka ho munaoba sin ho mes amseu in fuan.

⁴Ale sa' le UISNENO anmepu anmu'i in otan; es nane te atoni amaufinut in salit nane neki neu maten.

⁵UISNENO an un In to'an neu atoni nek amoko; In ka nafetin sin fa na'ko kasat.

⁶Atoni le na'kian Uisneno mes napeni sako sanat; atoni nek muti nane of na'lobon na'ko maufinu.

⁷Leka hom tom nek UISNENO, ho musu sin of anfani ho soba.

⁸Alekot anes hit simo hit upa kle'o nok amneot, na'ko atsimo upa naek mes na'ko susu' ma nisit.

⁹Mansian natenab ale salit, mes Uisneno es anlek lanan monit.

¹⁰Kesel ansimo kuasat na'ko Uisneno, es nane te in ka nasanab anbi in fekat.

¹¹UISNENO anlomi atoni le nasosa nok amneot, ma anbi in lukut ma anbi tnais.

¹²Neu akuasat, maufinu nane hanisit, natuin in plenat ma anhaek na'ki natuin amneot.

¹³Uab amneot nane antom nek ana' plenat, in nek atoni le na'uab nok amneot.

¹⁴Nek to'as na'ko kesel anfani etus kasat maten, mes atoni ahinet nami lanan he nasanut in to'as.

¹⁵Nek leko na'ko kesel neki athoes anbi monit, onle nope nasanut ulan anbi fauknais.

¹⁶Atmu'i nek hine naleko nes na'ko tapeni mnatu; tahin maupa nes noni muti le hit tapeni.

¹⁷Atoni nek alekot na'lo na'ko maufinu; atoni le anpanat in monin nane naneo ma nahafo in aon.

¹⁸Nek amoko neki kit neu maten; ma nek anaeb neki kit neu amle'ut.

¹⁹Alekot nesi tabaun hit nekak ma kat mu'i, fa amaus namfau na'ko tatuin atoni nek amoko le in anmu'i natuin sikat.

²⁰Ampanat sa' le nanoina nalali neu ko, he nati' ho mupeni alekot, mufnek neu Uisneno he nati' mumlil anbi ho monim.

²¹Atoni mahine nane mahine anbi in tenab alekot ma in uab sin nahelan ma mapalsai.

²²Nek ahinet nane anfani uf neu monit na'ko atoni ahinet, mes atoni amonot in mahamu'it natuin in mono anmes kun.

²³Tenab na'ko ahinet, in uab neki pailolit ma in noina sin anfut hit nekak.

²⁴Uab mahoe onle oni oef, min oni ma neki halinat neu aok.

²⁵Anmu'i lanan le atkisot namneo, mes anbi in amsopun lanan nane neki kit neu maten.

²⁶Salit neu het bukae namepan kit he tami, natuin hit aok hit atmepu nok matani.

²⁷Atoni amaufinut nami he nale'un in aon bian, in uab sin maufinu onle ai naflae.

²⁸Atoni nek amle'ut napoitan matoes, si'ut ma akan anbati kit nok hit sob leko.

²⁹Atoni abulalut anfuli in soba, ma neki in neu amle'ut.

³⁰Ampantom na'ko atoni le anhuma mo'e ma nabae matan, natuin in natenab salit amle'ut anbi in nekan nanan.

³¹Atoni amneot nane of napeni ua mnanu, in nakan anmof onle sobe le neki amlilat.

³²Ka ta to' fa labah leko nes na'ko taplenat; atpanat hit aok naleko nes na'ko tasikan kot mese.

³³Mansian nosu sulat he nahin neu in monin, mes neu he nati' natae kit nane alkun UISNENO.