Read Uab Meto AMSAL 18 Bible Online

AMSAL 18 - Uab Meto bible

AMSAL 18

¹Atoni le anbaitson na'ko atoni bian nane in ankius kun neu in aon anmes; es nane te in antite atoni bian sin tenab.

²Atoni amonot in kan lomi fa hine; alkun in anlomi hen etun ma naton in nekan.

³Sanat ma si'u nao namnes, leka in masi'u in mes maakan amsa.

⁴Atoni in molok anfani uf neu hine tasi ametak, namlia onle oe ansai.

⁵Ka naleko fa het pesi atoni abulalut, ma ta'susu' atoni amneot.

⁶Leka atoni amonot namolok, in napoitan matoes ma nami he matepo.

⁷Molok atoni amonot nane nale'un kun in aon, ma in nakleo in aon neki in uab sin.

⁸Maakan nane aminat kun; ma atoni anlomi hen ol nani.

⁹Atoni le nasaitan in mepu nane namnes nok atoni le anlomi he nale'un.

¹⁰UISNENO nane onle baik fatu le namep; atoni amneot nao neune napesion anfani bale tainine.

¹¹Mes atoni amu'it natenab nak in amaus anfani neot ma hafot neu in onle baik lape mnanu le namep ma anfen natef kot.

¹²Atoni nek amoko of natsel, mes atoni nek baun of maupa kun.

¹³Tatae tahun na'ko tatnin nane mo'et mono le masi'ut.

¹⁴Natuin nek lomit neu monit, atoni ansutai nuka; in afnekat ma in salit namneuk ma namsab.

¹⁵Atoni alekot anmenon hinet, atoni nek ahinet anlomi hen simo noina.

¹⁶Atfe sa'-sa' anfani on lanan hen haumakab kit nok anaet sin.

¹⁷A'uab ahunut anbi ekut mese nane naton in amneot, mes leka han tanas anbol nane anfani si'ut.

¹⁸Nok mnosu sulat matoes ma mabanat namneku, ma matoes anbi ana' plenat sin nabe'i tasopu tani.

¹⁹Olif tataf le tamenab tani in nekan mafena nesin het haumak in na'ko kot matani. Matoes anfani eka besi neu kit.

²⁰Neu molok le hit tauab hit mes atamis in nesan.

²¹Hit mak anmu'i kuasat he nafetin ai nale'un monit; es nane te atoni of ansutai kun in molok.

²²Atoni le napeni in fenai nane ansimo in upa natuin fenai nane UISNENO es anfe nani.

²³Atoni anukat matola anbi nek nu'ut ma totis mes atoni amu'it natae nok han aseke.

²⁴Anmu'i soba le ka na'ki fa mes anmu'i anhaumak anesin na'ko olif tataf.