Read Uab Meto AMSAL 19 Bible Online

AMSAL 19 - Uab Meto bible

AMSAL 19

¹Alekot kun neu atoni anukat le namneo anbi monit, na'ko atoni amonot le anlomi poi.

²Makoe ka nok fa hinet nane ka naleko ma namas fa; atoni le ka natenab nahin fa uab sin anmo'e sanat.

³Mansian namofu in aon anmes natuin in mono, nalali te in nasan UISNENO neu lasi nane.

⁴Atoni amu'it in soba ansato piut; mes atoni anukat in soba sin nasaitan.

⁵Atoni le napoibon anbi lef lasi, mes ka nafetnon fa na'ko kasat.

⁶Atoni mes-mese anlomi hen hanoe atoni naek sin nekan; ale atoni anlomi hen soba atoni amu'i noni.

⁷Atoni amamuit in olif tataf an niken ma nanebet in, sa' anteni in sob leko sin. Maski in naim lanan, in of ka namina nan fa sin.

⁸Sekau es nami hinet, in nek in aon, sekau es namnau noina in mes namlil anbi monit.

⁹Atoni le napoibon anbi lef lasi in mes napeni kasat ma mes namate in.

¹⁰Ka nabe'i fa he atoni amonot anmoni nok athoes; ma ka nabe'i fa ate naplenat in tuan.

¹¹Atoni ahinet mes an eka in maunu ma in to'as; in mapules natuin in naikoti atoni sanat neu in.

¹²Kesel in to'as nane onle meo asu namaun; kesel in manoen onle akum napet utan.

¹³Li'ana amonot nale'un in amaf. Fenai le anlomi munu onle oe ansai ka nas-nas fa.

¹⁴Ume ma amaus nane nabe'i tapeni na'ko mnasi, mes fenai ahinet nane UISNENO es anfe nani.

¹⁵Lasi pehe anmo'e atoni ma antup nunfin, ma anbi amsoput apehet nane of naeku nok amnahas.

¹⁶Atoni le natuin plenat Uisneno napeni honis, atoni le ka naupab mes anmate.

¹⁷Tuntaku amanukat namnes nok atfe tuntakus neu UISNENO; ma UISNENO es of anseunbanin nani.

¹⁸Ampanat ho anah leka fe anmu'i sona; kalu kahaf nane hom lomi amle'ut naek anbolan ko.

¹⁹Maut he nati' atoni le nato' labah antamin in to'as anmes. Leka ho hem tuntaku in, ho mes amsato amteni in to'as.

²⁰Leka hom lomi noina ma amsimo fainekat, anbi amunit of hom fani ahinet.

²¹Mansian anmu'i salit namfau, mes fekat UISNENO es of nanaobon.

²²Mo'et le tafnekan na'ko atoni mese esle' nek asutais ma aki'at. Leko nesi atmamui na'ko atfani on apoiba.

²³Mubes neu UISNENO he nati' ho monim namlil'; of ho salit natiabon ma mufetnom mu'ko snama.

²⁴Anmu'i atoni apehet le kan mae fa leka; antao mnahat neu in fefan.

²⁵Leka atoni nek amoko makasa, atoni leka namnanu fa anbi tenab of napeni noina. Leka atoni nek muti mabokan in hine nane mes ansato anteni.

²⁶Li'ana le anhamu'i ma nasi'u in mnasi, le nane li'ana le namaebon ma makle'at.

²⁷Au anah, leka ho kam lomi fa he munoina amteni, ho mes amnikan sa' le ho munoina mulali.

²⁸Atfe saksit le ka amneot, nane hit tabaun aplenat; atoni amaufinut in namlil leka in nale'un atoni bian.

²⁹Atoni amonot leka nanaebon mes matepo ma mabiso.