Read Uab Meto AMSAL 2 Bible Online

AMSAL 2 - Uab Meto bible

AMSAL 2

¹Au anah ko, amsimo au noina sin, ma ampanat au fainekat sin neu ko.

²Ampanat lasi alekot ma muhin in otan.

³Koi au anah ko, mami he nati' amu'i tenab ma mami nai nek hine.

⁴Mami nai onle mami noni mnatu, ma ampainote he mami in onle amaus naninbon.

⁵Nok nane ho mes muhin, amtaus neu UISNENO le nane in otan ma ho nekam natfai ma ho mupeni hine Uisneno apinat.

⁶UISNENO es anfe nek hine; na'ko In kun, mansian napeni hine ma tenab alekot.

⁷Neu atoni nek muti ma ka nasanab fa Uisneno antuntaku ma naneo nahafo In.

⁸UISNENO anpanat atoni-atoni amneot, ma nahafo atoni le anek In.

⁹Au anah ko, leka hom nen kau, ho mes muhin amneot, amnonot ma alekot. Ho mes muhin amsa, ho mes ampainote ho monim onme ka?

¹⁰Ho mes amfani atoni nek ahinet, ma ho hine nane mes anhalin ko nekam.

¹¹Ho tenab alekot ma ho hine nane mes naneo ma nahafo ko,

¹²ma nafetin ko na'ko monit amle'ut, ma na'lob ho aom na'ko atoni-atoni a'akan ma asi'ut.

¹³Sin kan lomi fa he natuin mo'et ma monit alekot; sin nao natuin lanan mesokan ma sanat.

¹⁴Sin halin nok neki sin mo'et maufinu.

¹⁵Sin ansinmak ma anbeo na'ko monit alekot ma amnonot.

¹⁶Mes neu ko au anah ko, ho mes nabe'i amtite fulit na'ko bife apaisa le anhanoe ko neki uab-uab min oni ma aminat.

¹⁷Bife nane ka na'kian fa in mone ma anikan nani in manta'en neu Uisneno.

¹⁸Kalu hom nao meu in ume ho mes amtam anbi maten. Amnao meu in ume namnes nok hom tam meu atoni amates sin balan.

¹⁹Atoni le in nao neune, in mes kan fani nem anteni fa neu lanan le nao neu honis aomina.

²⁰Es nane te au anah ko, mutuin atoni nek leko sin noina, ma amoni mutuin Uisneno In lomin.

²¹Atoni le natuin Uisneno In lomin, esle' atoni nek muti, sin mes namaika anbi pah le UISNENO anta'en nalali.

²²Mes neu atoni amaufinut ma asanat, Uisneno mes anpolin napoitan na'ko pah nane, on hun le anboki nani na'ko afu.