Read Uab Meto AMSAL 20 Bible Online

AMSAL 20 - Uab Meto bible

AMSAL 20

¹Mninut aset ma amafut namofu atoni neu lasi amle'ut ma mabanat. Atoni amonot es ninu talantia anmafu.

²Kesel in to'as, onle meo asu in maunu; atoni le nafena in to'as nane nale'un kun in aon anmes.

³Al atoni amonot es anlomi matoes ma mabanat; monit amneot nane na'lobon na'ko matoes.

⁴Atof lene apehet in kan mepu fa in lene leka in tabu antia, es nane te anbi tabu sekit in afu ka naton fa in nesan.

⁵Atoni in nekan nanan maleta onle oe mata le namnanu; mes atoni ahinet nahenu na'kone.

⁶Atoni namfau antek in aon sob leko, mes le amneot ma aki'at susat fe na'taeku tokan.

⁷Li'ana sin namlil leka sin anmu'i amaf nek leko ma amneot.

⁸Leka kesel antunon anbi toko lef lasi, nabe'i in nit ale maufinu.

⁹Anmu'i ka atoni le na'uab nak, “Au nekak naknino, ma au ufetnok na'ko sanat?”

¹⁰Tnais ma lukut ka amneot, UISNENO kan lomi fa,

¹¹Na'ko li'ana in mo'et nabe'i tahin nak in mo'et nane alekot ma amneot.

¹²Lukek he nati' tatnin ma matak he nati' atkiso, UISNENO es anmepu sin nua sin.

¹³Atoni le anlomi tupas in of anmofu anbi hakamu'it. Atoni le anmakoe anbi in mepu of in mnahat nathoe.

¹⁴Asosat ansakoi natuin bale upan mafena kun. Mes leka ansos nalali in malin natuin in napeni bael maupa nane.

¹⁵Molok le naheun nok nek hine, maupa nesin mnatu ma noni muti.

¹⁶Sekau es ansutai atoni bian sin tusa, in mu'in nane mamnaiti anfani on manta'en.

¹⁷Amaus le mapeni nautin lasi poi, ahun-hunut aminat kun, mes namuni te in minan onle fatu knutu.

¹⁸Salit naton in nesan natuin tenab le namtas; es nane te kais hi mepu nahun na'ko mitenab lek-leko.

¹⁹Atoni le in lomi ma na'uab atoni bian in kanan, in ka nabela fa lasi tolo'; kais mibua mok atoni le na'uab poi.

²⁰Atoni le ansukat in mnasi, in mes anmate onle paku mafulak anbi fai mesokan.

²¹Amaus le anbi ahun-hunut mapeni labah anbi amsoput nane ka tetus fa.

²²Kais amseunbanin maufinu meki maufinu; so mufnek neu UISNENO, fun In es antuntaku ko.

²³Fatu tnais ma lukut ma amneot UISNENO kan lomi nani fa.

²⁴UISNENO anlek ma anlulu nalali mansian in lanan monit anbi pah pinan; es nane te mansian ka nahin fa in lanan monit anmes kun.

²⁵Mutenab lek-leko nahun na'ko manta'en hem fe tulu neu UISNENO, natuin anbi munin ho mes amtofom.

²⁶Kesel nahin neu atoni amaufinut nane; in mes ankas ma namate sin.

²⁷Mansian in nekan nane anfani meusine na'ko UISNENO le natnan ale nekaf.

²⁸Leka kesel naplen nok manekat, amneot ma amnonot, in mes ana' plenat nabalah.

²⁹Atoni munif mahine natuin in matanin, ma mnasi maupa natuin in nakan anmof.

³⁰Sa' le antamin nak menu anbi ahun-hunut noes nani maufinu, ma naknino mansian in nekan.