Read Uab Meto AMSAL 21 Bible Online

AMSAL 21 - Uab Meto bible

AMSAL 21

¹Namnes nok UISNENO nanon noe he nati' ansai natuin In lomin, onane amsa In topu kesel in tenab.

²Atoni in mo'et oni namneo anbi in kisot, mes UISNENO es nahin salit anbi in nekan.

³Taos ma mo'et amnonot ma amneot anhalin UISNENO mes na'ko ale fua tulu.

⁴Atoni amaufinut nane nasanab, natuin in nek anaeb ma nek amoko es naplenat in.

⁵Atoni amakoet in salit nane neki athoes; mes taos ka nok fa tenab le namtas naton nukat.

⁶Amaus le mapeni ka nok fa amneot, of namneku labah, ma neki atoni neu nopu maten.

⁷Atoni amaufinut kan lomi fa he natuin aplenat; in mes napeni hamu'it natuin in maufinu anmes kun.

⁸Atoni le ansan, in lanan namfau; atoni nek leko in monin namneo piut.

⁹Naleko nesi tatua atbi ume po'an in si'un na'ko tamaika tatua tok fenai amatoes anbi ume mese.

¹⁰Atoni amaufinut in salit hen mo'e maufinu piut, in kan mu'i fa nek manekat neu sekau am sekau.

¹¹Kasat neu atoni a'akan anfani noina neu atoni le ka nahin fa. Leka tabokan atoni nek muti, in hine nane of ansato piut.

¹²Uisneno Amneot Amnonot nahin neu sa' of anbol anbi atoni abulalut in ume. In mes namofu sin talantia sin anmaten.

¹³Sekau le kan lomi fa sakoit atoni anukat, in mes ka mapanat fa leka in nami tuntakus ma babat.

¹⁴Neu he nati' tasanut to'as ma maunu, amfe babat ma tuntakus nok amnes-amnes.

¹⁵Leka amneot nane nanaoba, es nane te atoni nek leko anmalin mes atoni amaufinut mafutu.

¹⁶Atoni le ka natuin fa monit atoni ahinet in of antam neu amates sin balan.

¹⁷Atoni le anlomi hen malin, in mes nanuka piut; atoni le anlomi ma naklosan piut, in mes kan fani atoni amu'it.

¹⁸Leka UISNENO ankas to, ka atoni nek alekot fa, mes atoni amaufinut es napeni susal.

¹⁹Alekot kun leka tamaika anbi mnela hufui na'ko tamaika tabua tok fenai le anlomi lasi munu ma to'as.

²⁰Atoni nek ahinet mes anmu'i ma anmoni nok athoes; mes atoni amonot mes naklosan nani in amaus.

²¹Sekau es anlomi he nanaoba amneot ma lasi manekat in mes maupa ma anmoni nok athoes ma in uan amnanu.

²²Atoni ahinet mes nasik nan kot le meo naek sin anpanat, in of naskuku ale baki lape le sin nafnek neune.

²³He nati' tafetnok na'ko nukat, so atpantok anbi molok.

²⁴Atoni amoko ma nek anaeb anlomi si'ut ma mo'et amle'ut.

²⁵Apehet le kan lomi hen mepu; namate in aon natuin in salit anmes kun.

²⁶Anbi neno teme in natenab neu sa' le in ansali. Atoni le anmoni nok amneot in nabe'i hen fe nok athoes.

²⁷UISNENO kan lomi fa tulu na'ko atoni abulalut nes-nesi fuat le anfe nok salit amle'ut.

²⁸Atoni apoiba in tonas mes ka masimo fa; mes molok na'ko atoni le nahin lasi in tokon mes masimo.

²⁹Atoni amneot anpalsai in aon; mes atoni amaufinut anmafaub in human.

³⁰Kan mu'i fa hine, nek malule ma nek ahinet le anhaek na'ki anbi UISNENO In matan.

³¹Maski nak makenat maloitan neki bikase makenat, mes anlek lasi mnisat nane es UISNENO kun.