Read Uab Meto AMSAL 23 Bible Online

AMSAL 23 - Uab Meto bible

AMSAL 23

¹Leka hom tok ma ambukae mok atoni a'naet, mumnau neu in le nane sekau.

²Leka hom lomi hem bukae naek am eka ho salit nane.

³Kais amsinmakan mnahat aminat le naloitan nani. Kais-kaisa in he nakleo ko.

⁴Kais mususbom hem fani atoni amu'it. Am eka ho salit nane.

⁵Natuin anbi amaus nane of namneku anbi smela mese in nanan, onle manine ma naplel neu neno atnanan onle kakatasi panis.

⁶Kais ambukae mok atoni a'pakit ma amakli'at. Ma kais amlomi in amnahat aminat.

⁷Natuin, in of na'uab nak, “Aim het bukae; mubalab amteni,” mes anbi in nekan ka onan fa. In fefan min oni mes ateta anbi in nekan.

⁸Ho of amlo'an mufani sa' le hom ol mani, ma ho uab aminat neune kan mu'i fa in otan.

⁹Kais amfainek atoni amonot, natuin in of ka naupab fa ho fainekat.

¹⁰Kais mutnanib afu in tu'an ma in ekan, ai musik man li'anmanat in afu.

¹¹Natuin UISNENO nane pesit amepat neu sin le of anlaban ko.

¹²Ampanat ho kulu in noina ma munoina muhel ma mumep.

¹³Kais mumtau neu he nati' munoina ho anah.

¹⁴Leka hom tepo in meki ue, in of kan mate fa, mes in of anmoni.

¹⁵Au anah, au malin leka hom fani ahinet.

¹⁶Au mes amalin leka au nen ko, mumolok ale lasi nok amneot.

¹⁷Kais amnek menan neu atoni asanat. Mutuin piut neu Uisneno

¹⁸he nati' ho monim mapanat ma ho fainekat kais namneku.

¹⁹Amnen nai, au anah! Hom fani nai ahinet. Ampanat ho monim nok amneot.

²⁰Kais mubua mok amafut ai atoni apalu,

²¹natuin sin anfani amanukat. Leka hom tup piut, ka lo fa anteni ho of ampake bael pake atpisut.

²²Mutuin neu ho ama; natuin kalu ho ka mutin fa in ho kam bine fa. Leka ho aina namnasi, muton neu ho muupab in.

²³Noina amneot, amnonot, lasi noina ma hine — ale lasi nane ale nane ok-oke mes het sos sin, mes maupa nes neu he nati' tasosa sin.

²⁴So leko amaf mese namlil in of na'otbon leka in anah nane anfani ahinet.

²⁵So leko ho ama ma ho aina namlil natuin ko, so nati' fenai le nahonis ko namlil.

²⁶Ampanat lek-leko ma muleta au monik, hoi au anah ko!

²⁷Bife a'sua le anmapaisa anfani habi neu lasi amle'ut.

²⁸Sin of naeka onle asikat ma sin anhanoe atoni amfaut he nati' mapaisa.

²⁹Ho munin a'ka sa' es of anbol neu atoni le ninu tua min kase naek ma ninu tua amafut? Atoni nane of anhakamu'ion ma antam anbi nukat. In of anmatoe piut ma ansanane anbi monit. In matan amtasa ma in aon napapa', maski nak nabe'i in na'lobon na'ko lasi-lasi nane.

³¹Kais mufetnom he nati' tua min kase an aten ko, maski nak in masan nane nahelan, at kisot nalim anbi klas leka ansai natuin po'ak.

³²Anbi nok fa of hom tamis onle kaun laso anlau ko.

³³Ho matam naklima, ho tenab ankalnon ma ho fefam menu.

³⁴Of hom tamis onle hom bi ni bnao in panan anbi tasi in atnanan; of ho nakam ankeun nalali te hom li'om aom bian am bian.

³⁵Nalali te of ho mu'uab mak, “Oin ai atoni antepo ma anpas kau, mes au ka umnau fa neu sa' le antoman kau. Au sesa is! Ma au lomi he inu teni!”