Read Uab Meto AMSAL 24 Bible Online

AMSAL 24 - Uab Meto bible

AMSAL 24

¹Kais ho nekam namenan atoni amaufinut, ma kais amsoba mok sin.

²Sin of natenab al maunu ma namolok lasi amle'ut.

³Tafena ume toko nok nek mamun ma nek hine.

⁴Ma leka hinet nane anbine, of in ke'an sin natua neki bale maupa ma amasat.

⁵Atoni mahine in nesin atoni abe'it; hinet maupa nesin be'it matani.

⁶Natuin nahun na'ko manekat, of anmu'i tenab le namtas nahun. Ma leka fainekat namfau, anmu'i menuan anaek he nati' atbe'u.

⁷Atoni amonot of kan su' nahin fa nek hine nane, in of ka namolok fa sa' leka atoni namolok uab-uab maupa.

⁸Atoni le natenab maufinu piut, of antek nak afena lasi.

⁹Atoni amonot in lanan nane sanat kun. Atoni le nasi'u atoni bian piut, sekau am sekau of kan lomi fa in.

¹⁰Leka ho muoelbom anbi tabu ho mueko mok su'at, hom fani on atoni a'olet.

¹¹Kais amtetsom neu he mufetin atoni le makasa neu maten; mufetin atoni le neki ma nao neu bale he naboni in.

¹²Nabe'i ho mumolok mak, “Au ka painote fa lasi nane.” Mes Uisneno of anpanat ko. Ho muhin ma muneo ho tenab. In of anseunbanin neu mansian namnes nok in taos ma in mo'et.

¹³Au anah, ambukae oni hau, natuin nane alekot kun. Onle oni na'ko oni in kuna, aminat kun neu he mabukae,

¹⁴onane amsa hinet alekot neu ho smanam. Leka ho ahinet ko, of ho monim neno amnemat nane alekot kun.

¹⁵Kais onle atoni amaufinut le nabua he nasik atoni amneot ma nasik in ume.

¹⁶Natuin, maski nak atoni amneot anmofu piut-piut, in of anfen anfain. Mes ka onan fa, atoni amle'ut of antoman talantia namnoe.

¹⁷Kais mumlil leka ho musu sin napeni nukat, ma kais mumlil leka sin natsel.

¹⁸Natuin, namneo UISNENO of nit ho mo'et ma of in anso'i antam maufinu, ma of in kan kas fa ho musu nane.

¹⁹Kais muto'an ai amnek nanan atoni amaufinut.

²⁰Atoni maufinu kan mu'i fa fnekat neu monit anbi neno amunit.

²¹Au anah, mumtausan UISNENO, ma mubes neu kesel. Kais mutuin atoni le anlaban sin.

²²Atoni nane of namneku anbi smela, natuin Uisneno ai kesel of nasanut snama le kan fain fa lasi abaut.

²³Atoni ahinet sin namolok nak on i: Alef lasi kais ampesi mok bian.

²⁴Leka atoni ansan nak kan san fa, atoni amfaut of ansukat ma nasi'u alef lasi nane.

²⁵Mes alef lasi le ankas atoni asanat of in namlil ma naupab in.

²⁶Taes le namneo anfani takaf neu matalus amneot.

²⁷Kais mihakeb ume nahun na'ko miloitan hi lene, ma amu'i mepu le natonon.

²⁸Kais amsaksi neu atoni bian le ka nok fa sukit amneot, kais mupoibom hem futu in.

²⁹Kais mu'uab mak, “Au of a'seunbanin neu in sa' le in anmo'e nalali neu kau!”

³⁰Anbi ahunut au nao utuin atoni apehet le anmono in lene ma in lene tua min kase.

³¹Le au it anbi bale nane alkun kisan ma hun. In baki lape amsa ankua nalali.

³²Leka au umnau ma utenab lasi nane, au upeni noina le i:

³³Nak atesesa ma a'tup akleo, nok a tok ma atfafa nimak ma tasnas akleo,

³⁴susal ma nukat of nem ma antoman kit onle asikat le neki aikan.