Read Uab Meto AMSAL 25 Bible Online

AMSAL 25 - Uab Meto bible

AMSAL 25

¹Anmu'i anteni fainekat nono fauk-fauk na'ko Nai Salomo le in ameput sin es nasoni anbi sonaf Nai Hizkia, Kesel Yehuda.

²Antuna naliatas Uisneno natuin uab matolo'; nabes neu kesel natuin sa' le nabe'i in naton nani.

³Onle tasi ametak ma neno in amnanun onane kesel in tenab le ka masenu fa.

⁴Muknino muhunun noni muti na'ko klofo, he nati' in amasat nane apakaet anlul nani.

⁵Mu'lob afainekat-afainekat maufinu na'ko sonaf, he nati' ho plenat anhaek namep natuin amneot.

⁶Leka hom hake anbi kesel in human ma in matan so ho mubaunom, kais amo'esom on atoni anaet.

⁷Alekot anes anhone kit neu bale maaiti, na'ko anlelu kit het fe bale neu atoni bian le maupa nesin kit.

⁸Kais amanap he meki lasi neu alef lasi, natuin anbi amunit ho es musanab, of ho mo'e sa' anteni.

⁹Leka mutenab amsan mok ho soba, so muloitan al mok in anmes, kais hom fai atoni bian sin lasi tolo'.

¹⁰Natuin, atoni of antek ko aktuta lasi ma ho kanam namle'u anbi ho neno monit.

¹¹Tenab le mapoitan anmatom nok in tabu, onle mnatu anbi pika noni muti in nanan.

¹²Bokan atoni ahinet neu atoni le anlomi he natnin, onle kleni mnatu ai bale pake amasat.

¹³Atoni malelu le na'ki neki halinat neu atoni le anlenu nani, onle oe neki oe tene neu atof lene kun.

¹⁴Han manta'en le ka natiabon fa, onle nope ma anin le ka nasanut fa ulan.

¹⁵Nek asutais nok molok malule, anhel akuasat nekan, ma naklati nek musu.

¹⁶Kais miah oni oef anaek, natuin of hom lo'an mupoitan.

¹⁷Kais amnao piut meu ho aom bian in ume, natuin of in anlenan ko ma in nek nanan ko.

¹⁸Lasi poi namate atoni, onle suni, tutu ai as'anef a'aikat.

¹⁹Tafnek neu abulalut leka hit tam anbi nukat nane namnes onle tatamu teki nisif le nabeko ai atnao teki hae se'al.

²⁰Atsi neu atoni le antam anbi susal ma nu'ut namnes nok in ka matainusa fa anbi manikin in nanan, ai onle at op lalu haef neu papa'.

²¹Amfen ho musu sin hen bukae leka sin anmofu anbi amnahas, ma amfe mninut, leka sin anmeno.

²²Nok nane ho mumae in ma UISNENO of anfe nani ko athoe neno.

²³Anin abit neno kaben li of neki ulan; onane amsa manek nanan of napoitan matoes.

²⁴Tamaika anbi ume in si'un naleko nesi na'ko tamaika tabua ume mese tok fenai le anlomi lasi matoes.

²⁵Atsimo hanaf na'ko pah a'lo onle tinu oe tene leka hit atmeno.

²⁶Atoni nek alekot le nabaunon neu atoni abulalut namnes onle oe mata amneu kelet ai onle oe mata nahenu nok aknutu.

²⁷Ka leko fa leka atbukae tanesib oin hau, onane amsa ka naleko fa leka atpules atoni piut-piut.

²⁸Atoni le kan panat nan fa in aon onle kot le ankua ma naskuku anbi makenat.