Read Uab Meto AMSAL 26 Bible Online

AMSAL 26 - Uab Meto bible

AMSAL 26

¹Onle ulan ansanu anbi fauknais, ma sen-sene anbi manas, onane ka amneot fa leka atpules atoni amonot.

²Onle kolo naplel anbi neno tnanan, onane amsa kasat of kan toman fa atoni le ka nasanab fa.

³So tafleu bikaes luke mnanu ma atbiso bikase, onane atoni amonot so leko matepo.

⁴Atoni le natan atoni amonot, in amsa anmon onle atoni nane.

⁵Atoni amonot in han tanas so tatae in teki han taes amonot, he nati' atanas nane nahin nak namneo in ka ahinet fa onle in natenab nani.

⁶Atlenu atoni amonot he neki a'at, namnes onle hit mes at ipu hit haek ma tami menas.

⁷Onle atoni hae uku in nao neki in haen anmes kun, onane amsa neu atoni amonot le neki fainekat.

⁸Atpules atoni amonot, onle atfutun tamepan fatu anbi hau tes.

⁹Onle amafut napoitan skunat na'ko in niman, onane amsa neu atoni amonot mese le neki fainekat.

¹⁰Sekau es namepub atoni amonot ai atoni teta of namofu atoni namfau.

¹¹Onle asu anfani neu in lo'at, onane amsa neu atoni amonot le anmo'e anteni lasi mono.

¹²Atoni le anmono nis naleko nes na'ko atoni le natenab nak in ahinet.

¹³Apehet anlomi he namaika anbi ume; ma in nak, “Anmu'i meo asu es mone of anheke nan kau anbi lanan sin atnanan.”

¹⁴Onle eno anfun nabalah anbi in kain, onane amsa atoni apehet naklelo in aon anbi in hala tupa in tunan.

¹⁵Anmu'i atoni le anpeh nis, hen tao mnahat anbi in fefan amsa ka nabe'i fa.

¹⁶Apehet nane natenab nak in ahinet kun na'ko atoni hitu le anfe han taes le antom.

¹⁷Atoni le nok anselo anbi atoni bian sin matoes namnes nok atoni le anheke aus fui anbi in luken.

¹⁸Atoni le napoibon ma namolok nak, “Au ulaeba ko,” namnes nok atoni amaunut le nabae kenat le neki maten.

²⁰Leka hau nane namnoe nain, ai nani of anmate; leka aktuta nane anmate nalali, ale matoes mes namme;

²¹Onle atu ma hau anfuli ai talantia anmoni nabalah; onane amsa atoni amatoes of anhaputu nekaf piut.

²²Si'ut ma akan nane aminat kun; neu atoni le anlomi nani.

²³Onle nai afu mnose neki noni muti, onane amsa atoni le fefan min oni, mes nekan nahenu nok maufinu.

²⁴Atoni le an un to'an neu in aon bian in uab sin min oni kun mes in nekan nahenu nok poi.

²⁵Maski nak in anmahoe, mes kais ampalsai in; natuin to'as ankuas in nekan.

²⁶Maski nak in natolo' in nek to'as, ale atoni of nit in maufinu.

²⁷Sekau es anhani bola neu atoni bian, in of anmofu antam neu in nanan. Sekau es antuil fatu hen toman atoni bian, fatu nane of antoman nafani in.

²⁸Tapoiba atoni namnes nok at un to'ak neu in. Uab aminat neki amle'ut ma maten.