Read Uab Meto AMSAL 27 Bible Online

AMSAL 27 - Uab Meto bible

AMSAL 27

¹Kais mupoibom neu neno noka, natuin ho ka muhin fa sa' es anbolan ko.

²Kais munaeb ho aom anmes kun; maut he nati' atoni bian es anmo'e lasi anne, nes-nesi neu atoni le ho ka muhine.

³Fatu ma snaen nane fe makafa, leka tanesa nok nek menas le atoni amonot anmo'e nani.

⁴Nek to'as nane maunu ma naskuku, mes leka nek aktinus anbol sekau es anhaek namep ma na'ki?

⁵Alekot anes bokan nok mat-mat na'ko makenat anbi nekak nanan.

⁶Soba atepo teki han fainekat, mes musu anhanoe neki laso.

⁷Leka tamsen, oni oef amsa matite; leka amnahas antoman kit, le amenut amsa aminat.

⁸Atoni le nasaitan in ume, in onle kolo le nasaitan in kuna.

⁹Onle min fomeni ma afomenit le anhalin nekak, onane amsa alekot na'ko hit soba anhalin nekak.

¹⁰Kais amnikan ho soba ao ho ama in soba. Anbi nukat kais amtoti ho olif ai ho tataf hen tuntaku ko; ho aom bian le anhaumak ko maupa nesin ho in-ini le na'lo.

¹¹Au anah, so ho nek ahinet ko, he nati' au umlil ma nabe'i au utae ko leka nasi'u ko.

¹²Atoni nek ahinet na'lobon leka nit amle'ut, atoni amonot sin nao mat piut es nane te asnama antoman sin.

¹³Sekau es anlomi hen sutai atoni bian sin tusa, maiti ini amaus anfani futus neu in manta'en.

¹⁴Sekau es na'uab halinat neu in soba nok han a'aikat, anbi nok-noka namnes nok antek sukat.

¹⁵Fenai le anlomi matoes namnes nok ulan in aslutun le ansanu anbi neno teme mese.

¹⁶Ka nabe'i fa he in anta', onle anin le ka maeka fa ma mina le kat poh tane fa.

¹⁷Onle besi tias anfon besi tias, onane mansian nanoina na'ko in aon bian.

¹⁸Sekau es ansen hau, in mes napeni in fuan. Atuthaes mese maupab leka in antom nek in tuan.

¹⁹Onle oe le naton nafani ho humam, onane amsa ho nekam of naton ho aom.

²⁰Anbi amates in balan anmu'i bale piut; onane amsa salit ma lomit mansian kan mu'i fa in ekan ma in tu'an.

²¹Mnatu ma noni muti ansu' nani anbi ai; atoni of mahine leka naton in bekon tabu mapules.

²²Maski nak atoni amonot mabiso ma matepo, in mono nane of ka namneku nit fa.

²³Ampanat ho mu'it sin nok lek-leko,

²⁴natuin amaus nane of ka nabalah fa, ma kuasat neu he taplenat amsa of ka nabal-bal fa.

²⁵Hun anbi lene ma tubu amlefi ma mubuaba neu ho mu'it, mes anbi nane hun fe'u anmoni anteni.

²⁶Na'ko ho bib kase sin funun ho mo'e bael pake, ma ho bibi sin bian of ho musosa, he nati' amsos afu fe'u.

²⁷Na'ko bibi sin bian of ho mupeni sin susu, ho mok ho ume nanan sin ma ho atuthaes sin.