Read Uab Meto AMSAL 28 Bible Online

AMSAL 28 - Uab Meto bible

AMSAL 28

¹Atoni amaufinut naen maski kan mu'i fa es anli'u in, mes atoni amneot anhaek nabal onle meo asu.

²Leka to nasanab ana' plenat of masenu ma maseka, leka atopus nane ahinet, pah afan nane nabalah.

³Ana' plenat le nasusu' atoni anukat, onle ulan naek le nale'un pah in afan.

⁴Sekau es kan panat fa plenat, in anpesi nok atoni amaufinut, sekau es natuin aplenat in anlaban atoni abulalut.

⁵Atoni abulalut ka nahin fa amneot, ma atoni le naluli nabes neu UISNENO namneo in nahine.

⁶Leka nesi atoni anukat le nek muti na'ko atoni amu'it le nasusu'.

⁷Atoni munif le natuin aplenat nane ahinet. Mes atoni le nabua nok atoni aklosa nane namaeb in amaf.

⁸Sekau anfani atoni amu'it natuin susu' ma sufa naek in, mu'in nane of anmofu neu atoni le in nek amamu'it sin.

⁹Leka ho ka mutuin fa plenat Uisneno, Uisneno of anlo'an ho onen.

¹⁰Sekau es anfuli atoni amneot hen mo'e maufinu, in of anmofu antam anmes kun anbi nabit. Atoni le nek muti in of ansimo athoe neno talantia in namlil anbi in monin.

¹¹Atoni amu'it natenab nak in ahinet, mes atoni amanukat le nek muti of nahin in le nane sekau namneo.

¹²Leka atoni nek leko es naplenat, ale atoni anmalin, leka atoni amaufinut es naplenat, to of natolo'.

¹³Sekau es natolo' in sanat, in of ka nis fa. Sekau es an au ma nasaitan in sanat, of UISNENO nek in.

¹⁴Mibes piut neu UISNENO he nati' ho moni nok amlilat. Leka hom laban In, ho of mueku mok amle'ut.

¹⁵Atoni amaufinut le naplenat anukat sin, onle meo asu le in anbai ai onle asu fui an el hen hek.

¹⁶Ana' plenat le nasusu' atoni bian, in kan mu'i fa tenab aminat; ana' plenat le an un to'an neu amle'ut in of naplenat ton nao neu ton.

¹⁷Amate atoni of in naben nak anli'u in piut talantia in anmate; kan mu'i fa es hen eka in.

¹⁸Atoni le ka namle'u fa anbi monit of napeni honis. Atoni le anmoni anbi amle'ut of natsel.

¹⁹Atof lene le anmepu naek in mnahat of nathoe; atoni le anpolin tabu of anmofu anbi nuka.

²⁰UISNENO of anfe athoe neno neu atoni amneot, mes atoni le anlomi hen fani amu'it, of ka nafetnon fa na'ko kasat.

²¹Ka leko fa he nati' atbeti humaf atoni; mes anmu'i alef lasi le ka namneo fa ma in anlomi hen simo noni.

²²Atoni apalu anlomi hen fani amu'it; in ka nahin fa neu nukat of antoman in aon.

²³Atoni le anfe bokan anbi amunit in of maupa nesin atoni le natuna atoni bian.

²⁴Sekau le nabak na'ko in amnasi ma natenab nak nane ka sanat fa, in namnes nok atoni abakat bian amsa.

²⁵Ale tamnau neu hit aok anmes kun nafena matoes; es nane te naleko nesi kun leka hom palsai neu UISNENO.

²⁶Sekau es anfutnon neu in tenab anmes kun, in kan mu'i fa tenab alekot. Sekau es natuin noina hine of napeni honis.

²⁷Sekau es anfe neu atoni anukat in mes kan manuk fa. Sekau es kan tuntaku fa amanukat, of kasat antoman in.

²⁸Leka atoni maufinu naplenat, to of natolo'; kalu atoni amaufinut namle'u; atoni amneot of antopu sin nok malinat.