Read Uab Meto AMSAL 29 Bible Online

AMSAL 29 - Uab Meto bible

AMSAL 29

¹Sekau es anmalaban leka anfainek, anbi tabu mese of naskuku ma of ka naleko fa anteni.

²Leka atoni amneot es naplenat, to of namlil. Mes leka atoni amaufinut es naplenat, to of nanukbon.

³Sekau es anlomi nek hine, anhalin in amaf nekan. Sekau es nabua nok bife apaisa in naklosan nani in noni.

⁴Leka ana' plenat anpanat amneot, in pah nane of anhaek namep. Mes leka in nek nanesin noni, in pah of naskuku.

⁵Sekau es naaiti in aon bian, in antao kle'o neu in aon.

⁶Atoni amaufinut nakleo'on natuin in sanat, atoni amneot namlil ma namoek.

⁷Atoni alekot nahin atoni a'olet in-ini, mes atoni amaufinut ka nahin fa nane.

⁸Atoni le anlomi lasi akan ma si'u anmo'e taisibu anbi kot, mes atoni ahinet anmo'e to antainine.

⁹Leka atoni ahinet ma atoni amonot anmo'en lasi, atoni amonot nane of namaunu ma anmani talantia napoitan slutuf.

¹⁰Atoni le anmenon na' an un to'an neu atoni nek muti, mes atoni alekot naneo ma nahafo in.

¹¹Atoni amonot nato' mat-mat, mes atoni ahinet in nalan ma in ka nato' fa.

¹²Leka ana' plenat ansimo lasi poi, ale ameput sin anmaufinun.

¹³Atoni amanukat ma le nasusu' sin namnes; UISNENO anfe neu sin mataf hen kiso pina honis.

¹⁴Leka kesel anpesi nok a'olet, in of naplenat anbi ton-ton.

¹⁵Noina ma bokan nahineb atoni. Ainaf mese on namaebon leka natuin in anah in lomin piut.

¹⁶Leka atoni amaufinut es naplenat, ale tanhais nane anao piut. Mes atoni nek muti es napeni sona he nit atoni amaufinut in amle'un.

¹⁷Munoina ho anah, ma of in neki tainine neu ko, ma anfani halinat neu ko.

¹⁸To le ka napeni fa topus na'ko UISNENO anfani uf le nahenu nok taisibu. Ua alekot neu atoni le namtausan UISNENO.

¹⁹Ate mese of ka manoina fa al teki uab. In nahin mes kan panat nani fa.

²⁰Anmu'i fnekat naek neu atoni amonot, na'ko atoni le namolok mes ka natenab nahun fa.

²¹Ate le antuna fe na'ko in fe munif, anbi amsoput anfani anak fatus.

²²Atoni le nato' labah anmo'e atoni namfau anmatoen ma nasanab.

²³Of nanebet atoni nek anaeb; mes of naaiti atoni nek baun.

²⁴Atoni le anmepu nek bua nok abakat, nane nak in nato'an in aon anmes. Leka in naton nok amneot anbi tabu lef lasi, of ankas in. Mes leka in anta' kun, in of antoman kasat Uisneno.

²⁵Tamtausan atoni in tenab, neki kit neu susal ma nukat. Ampalsai neu UISNENO, he ho monim namne.

²⁶Atoni namfau anlomi hen haumak ana' plenat, mes le naton amneot alkun UISNENO anmes.

²⁷Atoni nek leko kan malinas fa atoni amaufinut; atoni amaufinut an un to'an neu atoni nek leko.