Read Uab Meto AMSAL 3 Bible Online

AMSAL 3 - Uab Meto bible

AMSAL 3

¹Au anah ko, kais amnikan au noina sin neu ko. Mumnau piut ale au plenat sin,

²he nati' ho mupeni au mnanu ma amoni nok athoes.

³So mak ho mubalah anbi fnekat ma mu'ki neu Uisneno ma ho aom bian,

⁴he nati' Uisneno ma ho aom bian antom nek ko ma naupab ko.

⁵Muteb nai neu UISNENO meki ho nekam oke, ma kais mupane ho hinem anmes.

⁶Mumnau UISNENO anbi ale ho mepu sin, es nane te In mes naton neo ko monit alekot.

⁷Kais mubai ho monim anfani ahinet, mes mutuin UISNENO, ma mu'lob ho monim na'ko maufinu.

⁸Ho taos ma ho mo'et anfani malo neu ko le naleko ho aom, ma anhalin ho nekam.

⁹Mibes neu UISNENO ma mitulu neu In, ho maus ma ho afu in afan le naleko nes,

¹⁰he nati' ho pana nahenu aen kase, ma ho tua min kase nathoe talantia kan mu'i anteni fa bale he mubika.

¹¹Au anah ko, leka UISNENO antepo ko, amsimo anfani lasi mnaub, ma kais ho nekam namen neu In noina nane.

¹²UISNENO antepo atoni le In nek nani, on amaf mese le antepo in anah le in nek nani.

¹³Ua alekot neu atoni nek ahinet ma napeni tenab alekot.

¹⁴In malinat nane naek nesin atoni le napeni noin muti, ma maupa nesin mnatu.

¹⁵Nek hine maupa nesin fatu klima, ale sa' le au sali ka namnes fa nokan.

¹⁶Nok nek hine nane ho mupeni ua mnanu, maus ma upab.

¹⁷Nek hine anhalin ho monim nok athoes.

¹⁸Atoni le natau hine in mes naeku nok monit alekot ma amlilat.

¹⁹Nok nek hine UISNENO anmepu neno tunan ma pah pinan, ma In antao nani neno oben anbi In balan neki In manekan,

²⁰Nok In hinen amsa In anmo'e oe mata abit nain apinan anpe' ma ansai, ma nope abit neno kupun nasanut oe ulan neu pah pinan.

²¹Es nane te, au anah ko amna' neu hine ma mutenab lek-leko ma kais mufetin,

²²es nane te ho monim mes mapanat — namas ma neki halinat.

²³Ho mes amnao nok tainine ma ka mustun fa.

²⁴Ho mes amtup ka nok fa amtaus, ma ho mes amtup amfin anbi fai teme.

²⁵Kais mumtausan snama le mes anbolan ko nok askeken onle nautus le antoman atoni-atoni amaufinut.

²⁶UISNENO mes anhaek nok ko ma anpanat ko, In mes ka nafetin ko fa hem tam anbi kle'o in nanan.

²⁷Leka ho mu'i be'it matani he nati' ho mo'e alekot neu atoni le anlomi he hom tuntaku in, kais amtite neu he ho mo'e lasi nane.

²⁸Kais amlenu ho aom bian he nati' anpao talantia noka, leka anbi tabu le nane ho mube'i hem tuntaku in.

²⁹Kais mutenab amle'ut neu ho aom bian le namaika anhaumak nok ko ma ho mufnek neune.

³⁰Kais ho mo'e taisibu le kan mu'i fa in lanan mok atoni le kan mo'e nit fa maufinu nok ko.

³¹Kais amnek nanan atoni le anmo'e lasi susu', ma kais mu mo'et sin monin.

³²Natuin UISNENO an un to'an neu atoni le anmo'e maufinu, mes in antom nek atoni le in moni nok amneot.

³³UISNENO ansukat atoni amaufinut sin ume, mes In anfe nani In athoe neno neu atoni le natuin In.

³⁴UISNENO an un to'an neu atoni neka naeb, mes In anfe nani In athoe neno neu atoni nek amnebet.

³⁵Atoni nek ahinet nane in kanan mes anfomeni, mes atoni amonot mes napeni akan ma si'ut.